Jowai, Risaw 01: Da ki phew hajar ngut ki riewngeit jong ka Balang Catholic na ka Jylla Niam Jowai, Nongstoiñ bad na ka Jylla Niam Bah Shillong ki la sakhi lang ha ka jingpynkyntang Lyngdoh Sad ïa u Rev. Fr. Ferdinand Dkhar, DD uba la shah thung dang shen ban shimti kum u u Lyngdoh sad bathymmai jong ka Jowai Diocese.
Ïa u Fr. Ferdinand la pynkyntang kum u Lyngdoh Sad ba pura ha ka sngi U Blei ha Church of the Holy Spirit, Parish Ummulong, West Jaiñtia Hills da u Most Rev. Victor Lyngdoh, u Archbishop jong ka Jyllañiam Bah Shillong uba la pynmynta ïa ka jinglehniam jong ka Mass Bakhuid.
Ha kane ka sngi, la sakhi lang da u Apostolic Nuncio sha India bad Nepal u Arcbishop Leopoldo Gerelli, ki Archbishop bad ki Bishop jong ki Jyllaniam ka thaiñ Shatei Lammihngi, ki Lyngdoh Sohblei, ki riewniam bad ki paid U Blei.
Nalor kine, la sakhi lang ruh da ki nongïalam saiñhima sima jong ka jylla ba kynthup ïa u Myntri Rangbah ka Jylla u Conrad Kongkal Sangma, u MP ka Shillong u Bah Vincent H. Pala, ki Myntri ka Sorkar Jylla, ki MLA, ki MDC bad kiwei kiwei kiba la shah khot sngewbha.
Kum ban shu pynkynmaw, la kha ïa u Rev. Fr. Ferdinand Dkhar ha ka 26 tarik Rymphang, 1962 ha ka shnong Ïongkaluh – East Jaiñtia Hills. U dei u khun phrangsngi na ki 10 ngut ki khun jong u Ma Edwin Kyndait bad ka Kong Philomina Dkhar. La pynkyntang Lyndoh Sohblei ïa u ha ka 23 tarik Kyllalyngkot, 1994.
Ha ka por shiteng sngi, la pynlong sa ka jinglehniam mane Sakramen ha kaba u Bishop Ferdinand Dkhar u la ai ïa ka kyrkhu kyrdoh lyngba ka Sacrament sha ki paid u Blei kiba ïalum sawdong jong ka duwan ka dupat.
Katba ha ka por nohphai sngi la pynlong ïa ki prokram leh burom ïa u Bishop Ferdinand Dkhar naduh ka Prayer Dance na ka St. Mary Mazzarello Convent, Jowai, ka shad pliang na ka Synjuk Kynthai, Jowai Diocese, ka Choir Piece na ka Bl. Joseph Nardini Seminary, Ummulong bad jingshad tynrai na ka Jowai Diocese Catholic Youth Movement, katba ïa ki kyntien ai khublei la ai da u Chancellor jong ka Jowai Diocese, u Fr. Martin Shylla.
