Shillong, Nailar, 22: Ka Hynñiewtrep Youths Council ha ka sngi baar ka la phah da ka jingthoh sha u Chairman jong ka Meghalaya Public Service Commission (MPSC), ban dawa ba dei ban pynbna noh ia ka result jong ka post Assistant Engineer ha ka tnat Community and Rural Development.
Ha ka shithi ka seng ka la pynpaw ba ka MPSC ka la khot aplikeshon na ka bynta ki post bapher bapher lyngba ka Advertisement No. MPSC/ADVT-54/1/2020-21/70 ha ka 14 tarik, Nohprah, 2020.
“Ha ka Serial No. 7 jong ka Advertisement, la khot aplikeshon ban pyndap na ka bynta ki 35 tylli ki Posts jong ki Assistant Engineer ha ka tnat Community and Rural Development hapoh ka Meghalaya Rural Engineering Services (MRES). Lyngba ka Notice No. MPSC/Ex-C/22/2021-2022/102 kaba la pynmih ha ka 3 tarik, Lber, 2023, la pyntip sha baroh ki nongaplai kam ba ka Written Examination kan long ha ka 18 tarik, Lber, 2023 ha ki ar tylli ki Centre, kata, ha Shillong bad ha Tura. Katkum ka jingioh jingtip jong ngi, ia kane ka eksamin la pynlong ha ka sngi bad ha ka por ba la buh na ka bynta palat shi hajar ngut ki nongaplai kam bad ia ka eksamin la pynlong da kaba pyndonkam ia ki OMR sheets,” la ong ka Seng ha ka shithi ba la soi da u General Secretary jong ka Hynñiewtrep Youths’ Council (HYC), Central Executive Council u Bah Roy Kupar Synrem.
“Hynrei, la palat san bnai ki la iaid naduh ba ladep pynlong ia ka eksamin na ka bynta ki post ba la kdew haneng hynrei haduh mynta ka Commission kam pat shym la pynbna satia ia ka result jong ka written examination. Ha ka jingshisha, ka jingpyndonkam ia ka OMR sheets ha ki eksamin bapher bapher ka la pynstet ia ka kam bad ka jingpynkhreh ia ka resulut ka la kham kloi bad ka pynduna ruh wat ia ki jingbakla. Hynrei ha kane kane ka jingpynslem ia ka result jong ka Witten examination da ka Commission ka la pynmih bun ki jingartatien halor ka jingkhuid jingsuba ha kaba pyndep ia ka jingthungkam bad kumjuh ruh kaba la ktah shikatdei eh ia ki nongthep kam la ka long ha ka jingmut jingpyrkhat bad ha ka ioh ka kot. Ka jingpynslem shuh shuh kan wanrah shuh shuh ia ki jingeh ia ka jingpalat ka rta thepkam jong kine ki nongaplai kam ha ki por ki ban sa wan,” la kynthoh ka Seng.
“Namarkata, ngi dawa jur ia ka Commission ba ka dei ban shimkhia ban pynbna noh ia ka result jong ki nongaplai kam kiba pas ha ka Written examination bad ban khot ruh mardor ia ka interview na ka bynta ki nongaplai kam bad ban pyndep noh mardor ia ka jingthungkam hapoh ka por kaba biang hynrei lym kumta, ngim donlad shuh da kumwei pat hynrei ban shu pynlong beit da ki jingiakhih pyrshah ia ka Commission,” la byrngem ka seng.
“Ngi kyrmen bad ngi kyntu ia phi kum u Khlieh jong ka Commission ban shimkhia lem ia kane ka jingdawa ba shongnia na ka bynta ka jingmyntoi jong ki samla bad ka jylla baroh kawei,” la bynrap ka Seng.
