Shillong, Naitung, 10: U Myntri Rangbah ka Jylla u Conrad Kongkal Sangma ha ka sngi Balang ula iathuh ba ki Pulit ki la mudui da ka ejahar pyrshah ia ki briew kiba donkti ban khynra Work Permit naphang ia ki nongbylla bar jylla kiba trei bylla ha kylleng ka nongbah Shillong.
Ha ka jingiakren bad ki lad pathai khubor, u Myntri Rangbah u la ong ba kino kino ki riewshimet lane ki kynhun bapher bapher kim lah satia ban pynlong ia ki jingkhynra nongbylla bar jylla bad kim lah ruh wat ban shim ia ka aiñ ha ka kti hynrei lada ki don eiei ki dei ban pyntip sha ki bor jong ka aiñ.
“Lada ki lap eiei, ki dei ban pyntip sha ki bor jong ka aiñ ba kan leh la ka jong ka kamram,” u la ong.
Kum ban shu pynkynmaw hangne, ki dkhot jong ka Khasi Students Union na ki shnat treikam bapher bapher ki la khynra naphang Work Permit na ki bar jylla kiba trei bylla ha ki bynta bapher bapher ka nongbah Shillong.
Ha ka sngi Baar ki dkhot ka KSU ki la pynlong ka jingkhynra Work Permit ïa ki bar jylla kiba trei ha JN Complex, Polo, Shillong ha kaba ka la mih ruh ka jingkynnoh ba ki dkhot ka seng ki la ktah kti ia ki nongtrei.
Ha ka jingkhynra ba la lamkhmat da u President ka KSU Shillong Mihngi Circle u samla Sonstar Nongkhlaw, la lap ba haduh 252 ngut ki nongbylla bar jylla kiba la wanrah da u Kontraktor ban trei ha JN Complex, Shillong ki dei ki bym don satia ïa ka Work Permit.
Katba ki dkhot ka KSU ki dang talasi ïa ki kot ki sla jong ki nongbylla bar jylla, la wan poi kyndit u Magistrate ryngkat ki ophisar na ka tna Labour bad ki Pulit na ka tnat Anti-Infiltration Directorare. Katba u Kontraktor um shym la wan mih satia.
Ym tang ha Shillong, ka KSU ka la pynjur ruh ia ka jingkhynra Work Permit wat ha ki shnat treikam bapher bapher kiba don ha rilum Khasi bad Jaintia kaba dang bteng haduh mynta.
Halor kane, ka Meghalaya Human Rights Commission (MHRC) ka la shim sou moto halor ka jingshah shoh jong ki nongbylla bar jylla kiba trei na ka bynta ka jingshna pynbha ïa ka J.N Complex, Shillong ha ka sngi Baar.
Ka Commission ka la phah ruh da ka notis sha u Superintendent of Police ka East Khasi Hills District ba un ai jubab kaba bniah halor kane ka jingjia hapoh ar taiew.
