Shillong, ïaïong 13: Ka Shad Suk Mynsiem kaba lai sngi jong ka Seng Khasi Kmie, kaba ju long manla u snem ka la sdang ha ka sngi Saitjaiñ ha kaba saw spah tam ki nongshad shynrang bad kynthei ki la iuh kjat ha ka lympung shad ha Weiking, Jaïaw.
Kum ban shu pynkynmaw ba kane ka shad ban ainguh aidem ïa u Blei Trai Kynrad u Nongthaw u Nongbuh, la ju pynlong manla u snem bad ha kane ka kynti ka dei artad ka jingshad kaba 113 snem.
Ïa ka Shad Suk Mynsiem la ju pynlong nyngkong ïa ka ha ka shnong Mawkhar, ïa kaba la kynriah noh pat sha ka lympung Weiking bad kaba la ïaid neh syndon tad haduh kine ki sngi.
Ïa kane ka shad la sdang shwa na iing Seng na Mawkhar ha kaba ka kynhun ki duhalia ki la tem ïa ka ksiang lumpaid bad hadien kane ka la don pat ka jingdwai kaba la lamkhmat da u Vice President ka Seng Khasi Kmie Rgh P.D Nongrum katba ïa ka jingïalang la pynïaid da u Asst Secretary ka Seng Khasi Kmie Rgh Païa B Synrem.
Hadien kane, ki nongshad ki la mih na iing seng ban ïaid kjat sha lympung Weiking bad shwa ban sdang ïa ka shad ka kmen, la pynlong shwa ïa ka nguh ka dem, ka dwai ka phirat da u Chairman jong ka kynhun u Tymmen U San ka Seng Khasi Kmie Rgh Skor Jala.
Hadien ba la pyndep ïa ka nguh ka dem, u President jong ka Seng Khasi Kmie Rgh O. Pyngrope u la shim ïa ka bynta ban kyntiew ïa ka lama jong ka seng Khasi bad pynbud pat sa ïa ka shad ka kmen.
Kane ka shad kaba lai sngi lynter ka dei kaba la paw bad bna nam kum kawei na ki la riti kaba nylla jong ka Bri u Hynñiewtrep u Hynñiewskum, kaba long kum ka dak ban ainguh aidem ïa la u Blei Trai Kynrad halor ki jingkyrkhu ba u la theh sei bad ba Un ïai theh sei ïa ka kyrkhu ka kyrdoh sha u khun bynriew.
