Shillong, ïaïong 13: Ka Voice of The People’s Party (VPP) ha ka sngi Saitjaiñ ka la mudui da ka ejahar ha u Superintendent of Police ka East Khasi Hills District halor ki jingshah pynjah burom jong ka party ha ka rynsan Social Media.
Ha ka ejahar ba la soi da u Election Agent ka party u Bah Danny Langstieh uba dei ruh u Finance Secretary jong ka VPP u la pyntip ba ka la don ka jingshna ia ka Facebook Account/ Page ba la ai kyrteng “Ardent Miller. -I-9856622858” da ki briew ki bym lah ban ithuh bad ka kyrteng jong u Admin jong ka Page la tip kum u “Satan Ba Pawnam”. Ha kane ka Facebook Account/Page la pynmih ia ka jingkynthoh kaba ong, “Ka Sur u Myndie ïa ka Ri ka jaitbynriew.”
U Bah Langstieh u la ong ba ka party ka la lap ba ki don katto katne ki briew bym lah ban ithuh ki la kynthoh ” HA U PRAH” ha ki khubor jingpyntip ïapbriew ha ka rynsan Social Media nangta ha ki lad pathai khubor jong ka Batesi TV, T7, bad kiwei.
Une u Election Agent u la ong ba da kaba pynmih kum kine ki jingkynthoh bad da kaba buh ha ka rynsan Social Media ha ki rynsan paidbah ka la pynjah burom bad ka la wanrah ia ka dak kaba sniew pyrshah ïa u President jong ka The Voice of the People Party uba dei ruh u dkhot jong ka Meghalaya Legislative Assembly bad lah ban kdew ruh ba kine ki jingkynthoh bad ki jingpynmih lyngba ki jingthoh la leh da ka jingthmu ban pynjah burom, ka pynmynsaw pynsniew bad pyniashun thlong mluh thlong sying, kaba la ktah mationg bad ka la pynsaphriang bakla ia ki jingpyntip sha ki paidbah kiba bun.
Ha ka ejahar, u la ong ba kine ki jingkynthoh ha ka Facebook Account/Page bad ki khubor jingpyntip iapbriew ka la long ka jingpynkheiñ ia ki kyndon bad ka la pynjah burom ia ka dur ka dar jong u nongmihkhmat bapaw bad u nongmihkhmat jong ki paidbah khamtam jong ka Voice of the People Party baroh kawei bad dei ha kane ka nongrim ba la mudui da ka First Information Report hapoh ki kyndon jong ka Indian Penal Code, 1860 bad hapoh ki kyndon ka Information Technology Act, 2000 bad kiwei pat ki aiñ.
“Kumta nga kyrpad ia ki bor jong ka aiñ ban pynshitom ia ki runar kiba la pynjah burom ia ka VPP katkum ki kyndon jong ka ain,” ong u Bah Langstieh ha ka ejahar.
Ia kane ka ejahar ka VPP ka la phah kopi ruh sha ka Cyber Crime Branch Office, Secretariat Hills Shillong, sha u Chief Electoral Officer ka Jylla bad sha u Commissioner and Secretary jong ka tnat Election.
