Shillong, Nailar, 14: Ka Hill State People’s Democratic Party (HSPDP) ha ka sngi Balang ka la kyntu ïa ka Sorkar Meghalaya Democratic Alliance (MDA) ba kan shim khia bad ka Sorkar Assam ban pynsdang biang ïa ka jingïakren pynbeit pud ha ka wat kaba ar na ka bynta ban pynbeit ïa ki hynriew tylli ki bynta ba dang don hapdeng ka jingïakajia pud.
Ha ka shithi ba la aiti sha u Myntri Rangbah ka Jylla Conrad K Sangma u President jong ka HSPDP u Bah KP Pangniang u la ong, “…ka seng ka pynpaw ïa ka jingsngewnguh ïa ka rai ba shlur ba la shim da ka Sorkar MDA hapoh ka jingïalam jong phi ba ki hynriew tylli ki jaka ba ïakajia pud ba la kynjoh jin shi spah snem la lah ban pynurlong ha u snem 2022 bad ka wat kaba ar jong ki hynriew tylli ki jaka ba ïakajia pud ki dang sahteng.”
“Watla katta ruh, ka HSPDP ka kyntu ïa ka Sorkar ban sdang biang ïa ka jingpynbeit ïa ka wat kaba ar bad ka Assam da kaba pynurlong noh mardor. Ka party ka sngewnguh shikatdeh eh ïa ka sorkar MDA kaba la lah ban ïakhun ïa kane ka kam kaba sahteng halor u pud u sam hapdeng ki ar tylli ki jylla,” u la ong.
Haba kren sha ki lad pathai khubor, u Bah Pangniang u la ong ba u Myntri Rangbah ka jylla u la pynthikna ïa ka kynhun ba kan sdang noh shen bad ka Assam ïa ka wat kaba ar ha ka jingïakren pynbeit pud. Katkum ka jingong jong u, u Myntri Rangbah u la ban leit ïakynduh ïa u Myntri Rangbah ka Jylla Assam shwa ban sdang ka dorbar synrai jong ka Ingdorbar Thawaiñ ka jylla ka ban sa long shen.
Shuh shuh u la ong ba ïa ki Regional Committee ladep ban thaw da baroh ar tylli ki Sorkar Jylla bad bynrap ba u Deputy Commissioner jong ka West Khasi Hills u la khot ïa ka jingïalang jong ka Regional Committee bad u la pynkhreh bad ki kot ki sla ban ai sha ka Assam ha ka jingïalang ka ban sa long.
Lah ban kdew hangne ba ka Regional Committee na ka bynta ka West Khasi Hills kaba la khlieh da u Bah Paul Lyngdoh u ba dei ruh u Myntri jong ka Sorkar Jylla ka la pynskhem ba ka jingdawa jong ka Meghalaya ïa ki 54 tylli ki shnong kiba hap hapoh ka thaiñ Langpih ka long kaba khlaiñ.
