Shillong, Nailur 25 : Ka Voice of the People’s Party (VPP) ha ka sngi Palei ka la mynjur ban phah ïa ka kyrteng jong u MDC na Nongthymmai Constituency Bah Winston Tony Lyngdoh ban shimti bujli ïa ka shuki Chief Executive Member (CEM) ha Khasi Hills Autonomous District Council (KHADC) hadien ba u CEM barim u Bah Shemborlang Rynjah u la hiar na ka shuki CEM ha ka sngi Balang da kaba pynpaw ba u don hapdeng ka jingshitom.
U nongai ktien jong ka VPP ha KHADC Bah Powell Sohkhlet ha u kyrwoh u la pyntip ba ha ka jingïalang la jied ïa u MDC jong ka Jaïaw Bah Denzil R Chen, ban shimti noh kum u Executive Member ba thymmai.
U Bah Winston u dei ruh u EM ha ka EC ba la ialam da u Bah Shemborlang Rynjah bad da ka jingshimti jong u ïa ka shuki CEM ka shuki Executive Member ka la thylli bad kumta ka party ka la rai ban pynrung bujli noh da u Bah Denzil.
Ha ka ingdorbar jong ka KHADC kaba 30 ngut ki dkhot, ka VPP ka don 18 ngut ki MDC kynthup lang ïa u MDC shu sieh u Bah Mathew Makdoh.
Katba ka NPP bad ka UDP kiba shong ha ka Liang Pyrshah ki don mar san ngut ki MDC, uwei u MDC shimet bad uwei pat na ka HSPDP.
