Shillong, Nohprah, 18: Ka jingleit ïaid kjat jong u MLA ka Mawkyrwat Constituency u Bah Renikton L. Tongkhar haduh 2 kynta shiteng ha u snem 2020 mynba u dang bat kum u Myntri ka tnat PHE naduh na ka shnong Markhew, Jakrem haduh ha ka shnong Jashiar ban wad ïa ka tyllong um ha Wah Rilang na ka bynta ka Mawkyrwat Greater Water Supply Scheme ka la long kaba seisoh ha kaba watla ym shym la tan shuh ïa ka um na Wah Rilang na ka bynta ka Mawkyrwat Greater Water Supply Scheme hynrei na kane ka jingleit ïaid kjat la lap ïa ka tyllong um na ka bynta ka Sakwang Combine Water Supply Scheme bad mynta kane ka projek ka la treikam pura bad ki lai tylli ki shnong, kata ha ka shnong Sakwang, Pyndensakwang bad Marshillong.
Ha ka jingleit jurip biang ha ka 18 tarik u Nohprah, 2025, u Bah Renik u la sngewhun ban lap hi da lade ïa ka jingtreikam jong ka skhim umdih kaba la tip kum ka Sakwang Combine Water Supply Scheme ha wah Rilang, Sakwang kaba jngai kumba 7 kilomitar eiei na Mawkyrwat, South West District Khasi Hill District ïa kaba la bei pisa lyngba ka Rural Infrastructure Development Fund ha ka jinglut kaba kot T.13 klur.
Nalor kane, hadien ka jingud jingnam jong ki paitbah ka thaiñ Shngimawlein halor ka jingjot noh jong ka jingkieng ïaid kjat ha Wah Rilang ha kaba ki paitbah nongrep katei ka thaiñ ki ju pyndonkam na ka por sha ka por na ka bynta ban leit rep leit riang, u Bah Renik u la kular ban sa pynïoh skhim noh ha u snem 2026 na ka bynta ban shna ïa ka jingkieng ïaid kjat.
