Shillong, Naitung 12 : Ka Meghalaya Aroma Mission ka la kylla long kaba jop ha kaba iadei bad ka jingpynmih ia ki jingthung aroma hapoh ka jingialam jong u Myntri Rangbah ka Meghalaya. Naduh ba la sdang ha u snem 2019 kane ka sienjam la lah ban pynkylla ia kine ki mar rep (aromatic plants) sha ki mar kiba seisoh ban kyntiew halor ka jingpynmih ia ki mar rep kiba neh, ha ryngkat ka thong ban kyntiew arshah ia ka kamai kajih jong ki nongrep bad ban kyntiew ia ka jinglong jingim ka jong ki.
Ha ka jingleit jurip sha kawei na ki jaka treikam jong ka Aroma Mission ha Byrwa, Ri-Bhoi District ha ka 7 tarik mynta u bnai, u Myntri Rangbah Conrad K. Sangma ha ryngkat ka jingsynran lang jong u Gunanka D.B. IFS Executive Director, INRM, u Arpith Upadhyay, DC Ri-Bhoi District bad ka Kong Isawanda Laloo, IAS, Secretary ka tnat ka rep ka riang, u Comrad u la pynpaw ia ka jingsngewhun halor ka jingseisoh ha kaba iadei bad ka jingpynmih ia kine ki mar rep kynthup ia ki mar umphniang nalor ki jingthung kiba lah ban ialeh pyrshah ia ki kynja khniang.
Ka Aroma Mission ka lah ban pynmih ia ki khatlai jait ki umphniang ba kongsan ha ryngkat ka jingiatreilang bad ka kynhun jong ki seng kynthei. Kine ki mar umphniang ki dei kiba la ioh lyngba ki jingthung bapher bapher kum ki Citronella, Lemon Grass, Turmeric, Vetiver, Winter Green, Geranium bad kiwei pat. Lah ban kdew ba kine ki phlang ki lah ban im wat ha ki jaka kiba long kumno kumno ruh, kata ha ki jaka kiba kiwei pat ki jait jingthung ki kham shitom ban mih. Nalor kata ka jingdon ia ki tynrai kiba rben ka iarap shibun ban tan um napoh khyndew bad kiba iarap ruh na ka bynta ka jingtwa jong ka khyndew.
Haba ai ka jingkyrshan kaba pura halor kane ka sienjam, na ka liang u Myntri Rangbah ka jylla u la pynthikna sha ki paid nongrep kiba don bynta ha kaba rep ia kine ki jait jingthung (aromatic plant) halor ki lad jingiarap ban kyntiew ia kane ka bynta. U la pynshlur ruh ia ki ba kin pynthikna halor ka lawei jong ki bad na ka bynta ka jingseisoh kaba neh ha kane ka kam, ka ban pynmyntoi ia ki nongrep bad ia ka ioh ka kot jong ka jylla. Nalor kata u Myntri Rangbah u la ban jur ruh halor ka jingkut jingmut jong ka sorkar ban ai ka jingiatreilang hapdeng ki kynhun seng na ka bynta ban kyntiew shuh shuh ha kaba iadei bad ka jingpynmih ia ki mar ki mata lyngba kine ki mar rep.
Ban kyntiew shuh shuh ia ka jinglah jong ka Byrwa unit, u Conrad K Sangma u la pynbna halor ka jingiarap shuh shuh na ka liang ka sorkar na ka bynta ban thied ia ki kor ki bor ne ki machine.
Ka Meghalaya Aroma Mission ka don ia ka bynta kaba khraw ha ka ban kyntiew ia ka jingrep ia ki aroma ha ka jylla bad ioh ruh ia ka jingjop kaba khraw. Haduh kumba 3,000 ngut ki nongrep ha ka jylla kaba kdup ia 500 hectare ki jaka bym shym la pyndonkam shuh la ai jingkyrshan hapoh jong kane ka mission. Shiphew jait ki mar rep aroma ki dei kiba man bha ha Meghalaya bad ia kiba la rep, bad lyngba kane ka mission ka don ruh ka jingthmu ban nang pyniar shuh shuh ia ka jaka rep sha ka 1000 hectare. Ki jingthung kum ki Wintergreen, Lavender, Damask Rose, bad Wild Marigold la shim ba ki dei kiba kongsan tam hapoh jong kane ka mission.
Ka jingphaikhmat jong ka sorkar Meghalaya ha kaba iadei bad ka Aroma Mission ka long nalor kane kane ka kam rep, khnang ban pynkhlain ia ki jaka treikam bad ban kyntiew ia ka ioh ka kot ha kane ka bynta. Shi bynta jong kane ka sienjam la lah ban thaw haduh 130 tylli ki kynhun Self-Help Groups (SHGs) kiba aibor ia ki nongrep ha kaba iadei bad ka jingrep bad ka jingpyniaid iew ia kine ki jingthung aroma. Nalor kata la lah ruh ban thaw ia ki cooperative societies na ka bynta ban shim ia ki sienjam ban iatreilang hapdeng ki nongrep kiba don bynta ha kaba rep ia kine ki jait mar rep aroma.
Ka Aroma Mission ka la lah ban pynmih haduh 4 metric ton, kaba la noh synniang shibun ha kaba iadei bad ki jingtreikam jong ki karkhana kiba iadei bad kine ki mar rep. Lyngba kane ka sienjam haduh 3000 ngut ki nongrep ki la ioh ia ki jingmyntoi lyngba kane bad kaba la kyntiew ruh ia ka jinglong jingim ka jong ki ha kaba iadei bad ka liang ka ioh ka kot.
