Shillong, Nailur, 26: Ka Khasi Author Society (KAS) mynta ka kynti ka la rai ban leit pynsngew sha ki tyngdong skhor ka Sorkar National Democratic Alliance (NDA) ba la ialam da ka BJP ban dawa ia ka jingpynrung ia ka ktien Khasi ha ka Khyrnit Baphra jong ka Riti Synshar ka Ri India.
U President ka KAS u Dr. D.R.L. Nonglait ha ka jingiakren bad ki lad pathai khubor ha ka sngi balang u la ong, ‘ban shu pynsngew lyngba ki lad pathai khubor tang hangne kam don jingmut hynrei ngi la rai ban pynlong da ka jingialang paidbah ha Jantar Mantar, New Delhi ha ka 30 tarik mynta u bnai.”
“Ban shu iaksaid tang ha rilum Khasi-Jaiñtia kam poi shano shano ruh. Naduh ki snem 2017-18 ngi la pynlong ia ka rally paidbah, ki jingpynshai ha ki District ka Bri u Hynñiewtrep bad ha kylleng ki jaka. Ka Sorkar Jylla ruh ka la shimkhia bad ha u bnai Naiwieng, 2018 ka Sorkar ka la rai ban kyntu ia ka Sorkar India ban pynrung ia ka Ktien Khasi ha ka Khyrnit Baphra,” u la ong
“Ka jingpynlong ia ka jingialang ha Jantar Mantar ka dei ka jingdawa ba shonghok kumba la kular da ka Riti Synshar ka ri India ha ka Article 29 kaba ong, ‘kano kano ka kynhun bynriew kaba shong hapoh ka ri India kaba don ia ka ktien, ka kolshor bad ki dak thoh la ka jong kiba kyrpang ki don ia ka hok ban pynneh bad ban pynsah. Kane ka Article ka ai jingkular ba ngin ioh ia ka jingithuh na ka Riti Synshar namarba haduh mynta ngim pat ioh,” la ong u Dr. Nonglait.
“Ha kiwei kiwei ki bynta ka Sorkar Jylla ha ka jingiatreikam bad ka Khasi Author Society (KAS) ka la ai ki jingiarap kat kiba ngi donkam. Mynta kane ka kam ka don ha Delhi, ngim tip haduh katno ka Sorkar Jylla ka lah ban pynkohnguh, pynsngewthuh, pynngeit ia ki nongialam jong ka Sorkar ha Dehi ban pynrung ia ka Ktien Khasi ha ka Khyrnit Baphra,” la bynrap u Dr. Nonglait.
U la iathuh ruh ba ka KAS kaba la lamkhmat mynta la 40 snem ban dawa ia ka jingpynrung ia ka ktien Khasi ha ka Khyrnit Baphra ka la sngewdei ban pynlong noh da ki prokram jong ka Society ha Delhi ha kaba yn sa pynlong ia ka National Seminar halor ka phang ‘Ka Ktien, ka Litereshor bad ka Kolshor Khasi.’
Ki nongiashim bynta ha ka National Seminar ka ban long ha ka 29 bad ka 30 tarik mynta u bnai kin long ki riewshemphang na nongbah Shillong bad na kiwei kiwei pat ki nongbah jong ka ri India baroh kawei, kum na Delhi, Pondicherry, Hyderabad, Bangalore bad na kiwei kiwei ki jaka.
“Ngi khmihlynti ba kane ka jingialang kan long kaba jop,” la ong u Dr. Nonglait bad bynrap ruh ba ka jingpynlong ia ka National Seminar ka dei ka jingiatreilang hapdeng ka KAS bad ka Hynñiewtrep Delhi Association (HDA) kaba trei na ka bynta ka bha miat jong ki Khasi kiba trei bad pule ha Delhi.
Ha ka sngi banyngkong jong ka seminar u MP ka Shillong u Bah Vincent H. Pala un sa long u Kongsan katba u Lamphang jong ka Iingdorbar Thawaiñ ka KHADC u Bah Lamphrang Blah un sa long u Symbud Kongsan nalor ka jingiadonlang jong ki dkhot sengbhalang bapher bapher na kane ka jylla.
Ha ka sngi kaba bud, u Myntri ka tnat Arts and Culture u Bah Paul Lyngdoh un long u Kongsan katba u Bah Alexander L. Hek un sa long u symbud Kongsan.
“Ngi kyntu ia kiba sah ha Delhi, kiba trei bad kiba pule ba kin iashim bynta lang ha kane ka National Seminar kaba ar sngi bad ngi kyntu ruh ia ki paid Khasi kiba leit donkam sha Delhi ban iashim bynta lang,” u la ong.
