Shillong, Nailur, 27: Ka jingïakhun bad ka jingïakynad hapdeng ki Khasi kiba sah ha ka shnong Lapangap, West Jaiñtia Hills District bad ki Karbi kiba sah ha West Karbi Anglong District, Assam ka la bteng biang mynta ka sngi Balang.
Naduh mynnin ka sngi baar, ki Karbi bad ki Pnar kiba la ïapynibor markylliang da kaba siat da ki jri siat sim. La sakhi ruh lyngba ki video ba la ïoh ring ba ki Karbi ki la pyndonkam wat da ki khnam bad ka ryntieh ban siat pyntieng ïa ki Pnar.
Ym tang ki shynrang, hynrei wat ki kynthei Pnar ruh ki la synran lang ïa ki shynrang ban ïakhun pyrshah ïa ki Karbi da kaba siat da ki jri siat sim.
Nalor kata, ha ka por shiteng sngi, kawei ka iing trep buh marrep jong ki Pnar ka la shah wiangding ha ki Karbi. Ki Pulit Assam bad ki Pulit ka Saitsama Police Out Post kiba la poi sha Lapangap ban tem ïa ka jingïakynad ki la shu long tang ki nongpeitkai ïa ka jingsiat jri hapdeng ki Karbi bad ki Pnar.
Hynrei hadien katto katne ki Pulit Assam ki la siat da ki Tear Gas sha ki Pnar kiba dang mareh ha ka jaka rep ha Tahpat khnang ban pynpra ïa ki Pnar kiba mih kynthei bad shynrang ban ïakhun pyrshah ïa ki Karbi.
U Deputy Commissioner jong ka West Jaiñtia Hills u Bah B.S Sohliya u la ïathuh ba ïa kane ka jingïakynad la lah ban tehlakam hadien ba la phah ïa ki Magistrate bad ki bor Pulit ban tem ïa ka ka jingïakynad na baroh ar liang.
“Ka jaka ka dei kaba hap hapdeng ka jingïakajia pud ïa kaba yn sa shim rai da ka Regional Committee, hynrei ieh shwa ïa kata sharud. Ka jingshisha hi ka long ba kane ka jaka ka dei ka nongkynti jong ki paidbah ka Lapangap bad ki la im da ka rep ka riang ha kane ka jaka,” la ong u Bah Sohliya ha ka jingïakren lyngba ka telephone.
U Superintendent of Police ka West Jaiñtia Hils u Bah C. Syrti u la ïathuh ba la phah ïa ki Pulit na ka Jylla Meghalaya ban leit pahara bad ban tem ïa ka jingïakynad hapdeng ki Karbi bad ki Khasi.
U la ïathuh ba la phah ar kynhun ki Pulit hapoh ka jingïalam jong u Deputy Superintendent of Police (Dy.SP) bad u Sub Inspector ban pynthikna pynneh ïa ka shongsuk shongsaiñ ha shilynter ka khappud.
“Ka dei tang namarba ki jaka rep ki don ha khappud, bad ka kamram jong ngi ka long ban ïada ïa ki,” u la ong.
Ki nongshong shnong ka Lapangap kiba im kamai jakpoh da ka rep ka riang, ki la kren bynñiaw ïa ka jingleh dusmon jong ki Karbi kiba jynrat naphang ïa u sying bad mait da ka wait ïa u jyntang kba uba la khie lung kat haduh ba ka la wanrah ka jingduhnong kaba jhor ïa ki Pnar ha Lapangap.
Dang ha ka taiew baladep, ka Dorbar Shnong ka la phah da ka jingthoh sha u Deputy Commissioner jong ka West Jaiñtia Hills ban pan da ki bor pahara na Delhi ha ka shnong Lapangap khnang ban ïada ïa kano kano ka jingthmu jong ki Karbi ban pynjulor ïa ki mar rep.
Ha u Nailar mynta u snem, ki Pulit ka Meghalaya ki la shah kawang da ki maw bad shah siat ruh da ki jri siat sim ha kane kajuh ka jaka ba la jia ka jingïakynad. Ki Pulit ki la hap ban randien khnang ban lait na kino kino ki jingjia ba sngewsih.
Kum ban shu kdew hange, ka jingujor ba nyngkong sha u Deputy Commissioner ka West Jaiñtia Hills ka long ha u bnai Naitung hadien ba shikynhun ki Karbi ba la synran lang da ki Pulit Assam ki la pynjulor ïa ki hajar tylli ki tynrai dieng ba la thung ha Tahpat ba la pynïoh lyngba ka Meghalaya Basin Development Authority (MBDA).
