Shillong, Naitung, 23: Ka ophis jong ka State Education Mission Authority of Meghalaya (SEMAM), Samagra Shiksha Abhiyan (SSA) lyngba u State Project Director u Swapnil Tembe uba dei ruh u Director jong ka State Education and Literacy (SE&L) ha ka sngi Baar u la pynmih ia ka jingpynbna ba la pynkynriah noh sha ka 29 tarik Naitung, 2024 kaba hap ha ka lah Sngi u Blei ha kaba iadei bad ka jingpynkut ia ka jingrakhe ka jingdap 4 snem ka jingiaid lynti jong ka National Education Policy (NEP) 2020.
Ka jingpynkylla noh ia ka tarik ka dei namarba ka Ministry of Education ka Sorkar India ka la buh sngi ban pynkut ia ka jingrakhe ha ka sngi u Blei, ka 28 tarik, Naitung, 2024.
U Myntri ka tnat Pule Puthi ka Sorkar Jylla u Rakkam A. Sangma lyngba u kyrwoh ba la phah sha ki lad pathai khubor u la iathuh ba kane ka jingpynkynriah noh ia ka jingrakhe sha ka Lah Sngi u Blei ka long namarba ka Sngi u Blei ka dei ka sngi mane Blei jong ki nongshong shnong Khristan ha ka Jylla Meghalaya.
“Kum ka jingpynkhreh ia ka jingrakhe ia ka National Education Week, ka Ministry of Education ka Sorkar India ka la buh hynriew sngi ban pynlong ia ka jingrakhe ia ka jingiaid lynti kaba saw snem ka National Education Policy, 2020 ha India kaba la sdang naduh ka 22 tarik mynta u bnai bad ban pynkut ha ka 28 tarik mynta u bnai. Ha Meghalaya ngi la sdang ia ka jingrakhe haduh ka 22 tarik, Naitung bad ka ban bteng haduh ka 28 tarik, Naitung. Namarba ka 28 tarik, Naitung ka hap ha ka sngi u Blei, ka sngi mane Blei jong ki Khristan ha ka jaka ka sngi u Blei, ngi la pynkynriah noh sha ka Lah Sngi u Blei, ka 29 tarik, Naitung, 2024,” la ong u Sangma.
