Shillong, Naitung, 05: U Symbud Myntri Rangbah ka jylla Bah Sniawbhalang Dhar uba long ruh u Chairman jong ka Regional Committee na ka bynta ka West Jaiñtia Hills un sa hiar jurip ïa ka shnong Lapangap ha ka 8 tarik mynta u bnai hadien ba la jia ka jingïakynad na ka daw ka jingkynnoh kyntur jaka da ka Sorkar Assam.
“Ngan sa leit jngoh ïa ka shnong Lapangap ban lum jingkheiñ ïa ka jinglong jingman,” ong u Bah Dhar.
Ha ka 25 tarik, Jylliew, ka jingïakynad ka la khie ha khppud Assam bad Meghalaya hadien ba ki paidbhur kiba don palat 400 ngut na ka shnong Lapangap bad na ki shnong ba marjan jong ka West Jaiñtia Hills ryngkat ka jingsynran lang jong ki sengbhalang ki la wiangding ïa ka iing bad jynrat ïa ki tynrai dieng kum ka jingpyrshah ïa ka jingthung tynrai dieng da ka Karbi Anglong Autonomous Council (KAAC), ha kaba ki la niew ba ka dei ka jingpyrshang ka Assam ban kyntur beaiñ sha u pud u sam jong ka jylla Meghalaya.
U Bah Dhar, ha ka sngi Balang, u la ong ba ka Sorkar Meghalaya ka la ïakren bad ka Sorkar Asasm ban ïapynbeit ïa kane ka jingeh kaba la jia dang shen ha ka shnong Lapangap.
“(Dei na kane ka daw) ba ka jinglong jingman ka la sdang ban wanphai biang sha ka shong suk shongsaiñ. Ngi dang don ha ka jingïakren ha ka kyrdan jong ki Myntri Rangbah ban ïapynbeit ïa kane ka kam,” la ong u Bah Dhar ha ka jingïakren bad ki lad pathai khubor.
U la ong ruh ba ka sorkar ka la trei shitom ban tam ïa ka jingïakynad kaba la jia.
Haba kylli hato ka Lapangap ka hap neem ha ka jaka ba don ka jingïakajia pud, u Bah Dhar u la pynshai ba mynshwa kam dei satia ka jaka ba don hapdeng ka jingïaknieh.
