Shillong, K’lyngkot, 05: Ka long ka jingsarong ïa ka jylla Meghalaya, phra ngut ki khynnah skul kynthei jong ka Loreto Convent School, Shillong ki la shah jied ban leit ïashim bynta ha ka International Taekwondo Winter Camp ka ban sa long ha ka ri South Korea.
Kane ka dei ka sien kaba nyngkong eh ba ki khynnah ïalehkai Taekwondo na kane ka jylla Meghalaya kin shah jied ban leit ïashim bynta ha kane ka rynsan ïalehkai ba la pynlong da ka Jeju Taekwondo Association ka ban sdang naduh ka 8 tarik u Kyllalyngkot bad ka ban kut haduh ka 16 tarik u Kyllalyngkot, 2026
Ki don baroh 15 ngut ki khynnah na kylleng ka ri India kiba la shah jied ban leit ïashim bynta ha kane ka Winter Camp bad na kine, 8 ngut ki dei ki khynnah kynthei na kane ka jylla Meghalaya.
Ïa kane ka kynhun yn sa ïalam da u Grand Master Wan Yong Lee, 8th Dan Black Belt bad ka Miss Pinky Narzary, 4th Dan Black Belt kaba dei ruh ka International Referee.
