Shillong, Jymmang, 26: Ka seng Hynniewtrep Integrated Territorial Organisation (HITO) ka la leit ban ujor sha Sadar Police Station ba ki don ki MLA kiba la jah rngai na la iing. Ha ka jingujor ba ka phah sha ki pulit, ka HITO ka la pyntip ba ki dkhot jong ka ki la leit wad sha iing sah jong ki MLA ha ki konstitwensi jong ki hynrei kim lap , kumta ki dkhot jong kane ka seng kiba don ha East Khasi Hills ki la leit wad sha iing sah jong ki kaba don ha Shillong hynrei kim lap.
Ka HITO ka la leit sha iing sah u MLA ka Sohra u Bah Gavin Mylliem, sha iing sah u MLA ka Mawhati u Bah Charles Marngar, sha iing u MLA ka Ranikor u Bah Pius Marwein bad sha iing jong u MLA ka Mawsynram u Bah Ollan Sing Suin. Ha kane ka jingleit jong ki -ki la ioh iakynduh tang ïa u MLA ka Mawsynram katba ïa kiwei pat kim lap satia. Ki la kyrpad ïa ki pulit ba kin wad lem ïa ki khnang ba kin ioh ban ai ïa ka shithi ha kaba ïa dei bad ka Reservation Policy.
