Shillong, Jymmang, 26: Ki nongialam jong ka Education Cell jong ka Khasi Students Union, Seng Kmie ha ka miet shiteng synñia sngi Thohdieng ha ka por 1:00 baje mynstep ki la leit jurip ia ka PGT College, Shillong hadien ba la ioh jingtip halor ka jingsah miet jong ki samla ha phyllaw jong kane ka College tang ban ioh ia ka Form na ka bynta ban ioh bteng ia ka jingpule Bachelor of Education.
Katkum ka jingtip ba la ioh lum la iathuh ba ki samla ki la ieng lain lypa naduh dang step phyrngab hadien ba ki bor pyniaid jong kane ka College ki la pyntip ba ia ki Form yn sam tang 150 tylli ha ka 24 bad ka 25 tarik, bad sa 200 tylli ha ka 26 tarik u Jymmang, 2023.
Na ka liang jong ki nongialam ka KSU ki la rai ban leit iakren bad ka tnat Pule Puthi jong ka Sorkar Jylla ha kaba iadei bad ka jingdawa ban kyntiew ia ka jingdon jong ki Seat pule ha kane ka College namarba ia mynta ki Seat ki don tang 32 tylli.
