Shillong, Lber, 31: Ka Jaintia Students Union (JSU) ka lah maham tyngeh ia u Gopal Deu bad ia ka Committee jong u ba kim dei ban pynshit lane kynnoh kulmar ia ki dkhot ka KSU ba ki dei kiba donkti ban pyniap ia ki ar ngut bar jylla ha ha Ichamati .
“U Gopal Dey um dei ban shu kynnoh kulmar bad ka seng ka lah ong ba ki bor Pulit ki dei ban pynngat bad shitom hapoh ka aiñ ia u kum kine ki briew kiba kynnoh khlem ki sabut satar ba biang,” la ong ka seng ha u kyrwoh ba la phah da u President u Bah Jersom Shylla.
“Lada jia eiei ia ki bar jylla la shu kynnoh beit ia ki dkhot sengbhalang na ka por sha ka por bad ka seng ka maham ruh ia u Gopal Dey ba um dei ban shu kynnoh khlem ka sabut bad ka kynhun tohkit ki Pulit ki la leh la ka kamram,” u la ong bad bynrap, “ka seng ka dawa ruh ia ki bor synshar distrik bad ia ka sorkar ba da leilei ym dei ban ailad ban pynlong jingialang ki ne ki kynhun poiei ka CWC namar kan nang pynshit ia ki dkhot ka jaitbynriew bad kan nang wanrah shuh shuh ia ka jingsngew pher jaitbynriew bad ia umsnam,” la ong ka Seng.
“Ka seng ka buh jingkylli ruh na ka Sorkar Jylla ba ia ki bar jylla thrang snam kiba dkhat bad pyniap ia ka mynsiem ba lui lui jong u samla Lurshai Hynniewta ha Ichamati, hato la iohkem neem ia ki bad haei lah set ia ki ? Ka JSU ka lah dawa na ka Sorkar ba ka dei ban sei madan ia ka case bad ban pynpaw pyrthei ia kito ki bar jylla kiba dkhat bad pyniap ia ka jingim u samla jong ka Bri u Hynñiewtrep,” la ong shuh shuh u kyrwoh.
