Shillong, Lber, 31: Ha kawei na ka jingjia ïa tyngkhuh kali kaba la jia ha ka 31 tarik, Lber, 2024, ar ngut ki samla kiba la tip kyrteng kum u Khrawbor Pakma bad u David Sajem ki la duh ei ïa la ka jong ka jingim, hadien ba ka Scooty kaba ki shong kaba don ïa u number ML05 AB 5721, ka la leit tynrah ïa kawei ka kali Hyundai Eon bad ha kajuh ka por ka la leit tynrah pat sa ïa ka shaka jong kawei ka Trok.
Katkum ka jingtip ba la iohlum na ki bor Pulit, la iathuh ba kine ki arngut ki samla kiba dei na West Jaintia Hills ki la ngat ha kane ka jingjia ha ka por 3.30 baje janmiet katba ki dang iaid lynti ha surok Shillong By-pass kaba don hajan Tyndai Resort.
Ka tyllong khubor na ki Pulit ka iathuh ba kane ka la jia tang namar ba ka Scooty ba la shong da kine ki ar ngut ki la thmu ban knieh ïaid shakhmat ïa kawei ka kali Hyundai Eon kaba don ïa u number ML 05 K 2600 ba la ñiah da u Bah B. Marbiangbor Thangkiew na Nongkseh, Upper Shillong bad ha ka jingpynher ïa ka Scooty ki la leit ban tynrah kylla ïa kane ka kali bad hadien kata, ka Scooty ka la leit ban tynrah sa ia ka shaka jong kawei ka trok kaba don ïa u Number ML 11 8622, ba la ñiah da u Iohbor Lapasam na ka shnong Shangpung, East Jaintia Hills kat haduh ba kine ki ar ngut ki la shah iuh na ki bynta jong ka khlieh bad duh syndon ïa la ka jingim.
Hadien ba ki Pulit ki la pynlong ïa ka jingtohkit ki la rah noh ïa ka met jong kine ki ar ngut sha Civil Hospital Nongpoh ban pyndep ïa ka Post Mortem.
