Shillong, Naiwieng 03: Ki Motor Vehicle Inspector (MVI) ha ka janmiet sngi thohdieng ki la bat naphang ïa ki trok kit mar ha Lad Umroi, Umïam, kynthup ïa kiba kit marbam mardih kiba dang thmu ban rung sha nongbah Shillong
Kine ki trok ki la shah bat ha ki MVI jong ka tnat Transport ka Sorkar Jylla ka long namarba la pyntreikam pyrkhing ïa ka hukum jong ka tnad Bording kaba mana bad buh da u pud ban shah ïa ki kali kit mar ba kin ïaid nalor ka jingkieng Damsite.
Ïa kane ka hukum la pynmih da ka Under Secretary jong ka tnat Bording ka Kong Josephine Nongbet kaba la phah sha ka Deputy Commissioner jong ka East Khasi Hills Kong RM Kurbah ba kan pyntreikam mardor.
Kane ka heh Ophisar jong ka tnat Bording ka la kynthup ruh ba ka kaiphod halor ka Safety Audit jong kane ka jingkieng pyllait um ha Umïam ba la ïoh na ka IIT, Guwahati, ka la ai jingmut ba ym dei shuh ban shah ïaid ïa ki kali heh na kane ka jingkieng katba ym pat lah shna bha ïa ki Girder Beam bad ïa ka Deck Slab.
Ka kynhun ki nonglum khubor kiba la hiar sha Lad Umroi ha ka jingïakren bad ki nongniah trok kiba kit ïa ki marbam ki la pynpaw ïa ka jingsngew khohñïoh halor kane ka jingshah pynphai kylla na Lad Umroi ha kaba ki MVI kim shym la shah shuh ban ïaid lyngba ka jingkieng Damsite.
“Kiba bun hi ki dei ki trok kit marbam ba ngi thmu ban leit kit sha Shillong. Lada ki bor bahalor ki khang ban ïaid ïa ki trok ki ladei ban pyntip lypa hynrei ym ban shu leh kumne,” la ong ki nongñiah trok ha ka jingïakren bad ki lad pathai khubor.
Ha kane ka janmiet, la sakhi ruh da ki phew tylli ki trok kit mar ki bym shym la ïoh shuh ban ïaid lyngba na ka jingkieng Damsite.
“Ngi kyrpad ïa ki bor bahalor kiba peit ïa kane ba kin pyrkhat. Khlem ïoh notis ngi shu shah pynieng hangne bad lada poi ki mar kan buh jingeh bad kan pynkiew dor ïa ki marbam,” la ong ki nongñiah trok bad ïathuh ruh ba bun na ki trok kiba la shah bat ki dei beit tang ki trok kiba kit marbam kum u khaw, ka shini, u phan, u piat bad kiwei kiwei.
“Ngi lei ngi kit ïa ki marbam tang hapoh 18 ton katba ïa ki kali kiba ïaid mynmiet kiba kit mawiong kam leilei kiba kit 30 ton. Lada ki kali kit marbam ka ktah ïa ka jingkieng hato ki kali kit maw kam ktah seh ïa ka jingkieng kiba kit 30 ton, 40 ton?” la kynthoh kine ki nongñiah trok kiba kit marbam.
Katkum ka jingïathuh jong kine ki nongñiah trok, kiba bun na ki trok ki dei kiba la shah bat naduh hynnin ka miet sngi Palei bad ki nongñiah trok ki pynpaw ruh ka jingsngew sih ba ki nongñiah trok kim ïoh wat tang ka bam ka dih.
Haba pynpaw ïa ka jingpyrshah katkum ka hukum ban pyllait tang ïa ki kali kiba kit tang 15 ton, ki nongñiah trok ki la ong, “kam ïahap satia ban pyllait tang 15 ton namarba tang ka kali ruh ka la khia lypa 8 ne 9 ton bad sa ki mar ki mata ka la nang khia shuh shuh. Ngi kyrpad ïa ki bor bahalor ba kin peit bad kin ïarap lem ïa ka jingeh jong ki nongñiah trok.”
“Lada ngi ïaid kyllaiñ sha Mawryngkneng ka marbam ka la kiewdor namarba tang ka jingshah khrong pisa ha lynti ha ki khyrdop, ha ki Pulit kaba hap siew shane shatai ka jinglut ka poi haduh 7 hajar tyngka. Kan ktah beit ïa ka jingkiewdor. Lada ki trok kit marbam kim lah ban ïaid, kumno ki trok kit dewiong bad ki trok kit maw ki lah ban ïaid na ka jingkieng,” la kynthoh ki nongñiah trok.
