Shillong, Lber, 04: Uwei u nongñiah kali tourist Nongstoiñ-Shillong uba la tip kyrteng kum u Bah Mcbornbonnyson Kharbani, 29 snem ka rta uba sah ha ka shnong Pathew Mawthadraishan, Eastern West Khasi Hills District u la duh ei ïa la ka jong ka jingim hadien ba u la shah pynïap dusmon da kaba shah dung da ka wait ha ki runar.
Katkum ka thymmei khubor ba la ïoh lum la iathuh ba kane ka la jia ha ka por shiteng synnia Sngi U Blei kumba 12:15 baje ha ka taxi stand Kynroh kaba don ha sor Nongstoiñ katba u Bah Macborn u dang wan jingwan bad u dang thmu ban leit phai noh sha ïing sah kaba don ha Nongstioñ.
Ka Kong Aitioris Kharbani kaba dei ka bahaing jong u lanot, ha ka jingiakren bad ki nonglum khubor ka la ïathuh ba ha shwa ba un shah pynïap u Bah Mcbornbonnyson u la telephone sha u kurim jong ka ban pan jingïarap namarba ki don katto katne ngut ki briew kiba la wan kynroi ïa u bad lyngba ka telephone ki la ïoh sngew ruh ïa ki jingïania bad timsih timsang jong kita briew kiba la kylli ruh ïa u ba u dei neem uta uba ki wad ma ki ha kaba u la jubab ruh da kaba ong ba um dei.
Ka la ong, katkum ka jingïoh sngew lyngba ka telephone ha ka por ba ki ïakren la sngewthuh ba ki wad ïa uwei pat u briew hynrei kaba sngewsih ka long ynda la poi ma ki ha ka jaka ba ïakajia ki la lap pynban ba u Bah Macborn u la thiah lyngktar ha surok hapdeng ka jingphlei snam na ki bynta ka shadem bad khladnoh noh ha kane hi ka jaka tang hadien katto katne por.
Na ka liang jong ki bahaing hasem ki mudui da ka ejahar ha Nongstoiñ Police Station.
Mar mar, ki Pulit ka Nongstoiñ ki la ïoh kem ïa uwei u briew uba la tip kyrteng kum u Medius Mawlot na ka shnong Mawkaton uba la shah suba jur ba u dei uba donkti ban dung ïa u Bah Macborn.
Ki Pulit ki la register ïa ka case bad ka jingtohkit mynta ka dang ïaid shakhmat.
Ki bahaïing ha sem jong u Bah Mcbornbonnyson ki don ka jingsuba kaba jur ba ki briew kiba donkti ha kane ka kam runar ki don kumba 4 ngut ban khang kdong ïa u, kata, katkum ka jingïohsngew jong ki haba ki ïakren lyngba ka telephone ha ka por ba u pan jingïarap bad phah wan ïa ki bahaïing.
U Bah Bankitkupar Kharbani u hymmen jong u Bah Mcbornbonnyson haba ïakren bad ki nongthoh khubor u la ïathuh ba u Medius Mawlot uba la shah kem ha ki Pulit u la kam ba u don tang marwei hynrei u Bah Bankitkupar u ong ruh ba ki don ki briew kiba lap ïa kane ka jingjia hynrei katba ki dang thmu ban leit ai jingïarap ïa u Bah Macborn ki la shah byrngem dung wait kylla ha ki arngut ki briew kiba don ha katei ka jaka ha kaba kim banse ban phet noh sha la ing.
Ki bahaing hasem ki la dawa ia ka tnat Pulit ba kan pynlong ia ka jingtohkit kaba bniah bad ban kem mardor ia ki runar kiba donkti ha ka kam pyniap briew.
