Shillong, Lber 04: Ki Pulit ka Ribhoi District kiba la ioh ia ka jingtip kaba bniah na ki tnat syntiat halor ka jingdon jong kawei ka trok kaba kit ia ki mar kiba long be-aiñ ki la pynlong ka jingap shrip ha Lad Umsaw ryngkat ka jingiatreilang bad ki Pulit CRPF jong ka 67 Battalion.
Ha ka jingtalasi ia ki kali ha surokbah Four Lane ha Lad Umsaw, ki Pulit ki la iohbat ia kawei ka trok kaba don ia u nombar NL 01-AH-5853. Ha ka jingtalasi ia kane ka trok katkum ki kyndon jong ka Narcotic Drugs and Psychotropic Substances Act, 1985, ryngkat ka jingdonlang jong ki nongsakhi ki Pulit ki la ioh kurup 280 song u Ganja uba don ka jingkhia kaba 4,746. 409 kilo uba shongdor 20 klur.
U Superintendent of Police jong ka Ri-Bhoi District Jagpal Singh Dhanoa ha u kyrwoh ba la phah sha ki lad pathai khubor u la iathuh, hadien ba la kurup ia u Ganja, ki Pulit ki la kem noh ia u Babulal Sheikh uba la 48 snem uba dei na ka Jylla Maharashtra. Ki Pulit ki la kurup ruh ia kawei ka Mobile Phone Nokia bad ka Sim Card Airtel bad ka pisa kaba 3,760 tyngka na ka met jong u Babulal Sheikh.
Ha kaba iadei bad kane ka jingjia, ki Pulit ki la register case hapoh ki kyndon jong ka Narcotic Drugs and Psychotropic Substances Act, 1985 ha Umiam Police Station bad ka jingtohgkit mynta ka dang iaid shakhmat ban lap ksai ia kiba donkti ha kane ka kam shalan beain ia u Ganja.
