Shillong, Nailur, 09: U MLA barim jong ka Mawlai Constituency u Bah Process T. Sawkmie u la kam ba bun ki Sports Club kiba don hapoh Mawlai Constituency ki la shah iehnoh beiñ namarba kim ju ïoh shuh ïa kino kino ki jingïarap na ki nongmihkhmat.
U Bah Process u la pynmih ïa kane ka jingkynthoh ha ka jingïakynduh kyrpang jong u ïa ka Umphrew Sports Club ha ka Lah Sngi u Blei hadien ba kane ka Sports Club ka la kyrpad ïa u ban ïarap lem na ka bynta ban pynlong ïa ka Football Tournament hapoh shnong.
U la pynpaw ruh naduh bym long MLA shuh u Bah Process ym ju don shuh ki Tournament ha kiba bun ki shnong kiba don hapoh Mawlai Constituency.
Kumta ha kaba ïadei bad kane ka jingbym ïoh jingïarap u Bah Process u la pynpaw ïa ka jingsngewkhia namar ka jingshah iehnoh beiñ jong ki Sports Club, ki Seng Samla bad kumjuh ki samla ba donsap kim ju ïoh shuh ïa kano kano ka jingïarap pisa na ka liang jong ki nongmihkhmat.
