Shillong, July 06 : Ka phlim Rapture, kaba la pynmih da u nongshna phlim bapawnam ka jylla u Dominic Megam Sangma, ha ka sien kaba ar, ka la shah jied ban pyni ha ka Locarno Film Festival, Switzerland ha ka jingiakop na kylleng ka pyrthei ha Concorso Cineaste del Presente Section, ka ban sdang naduh ka 2 tarik haduh ka 12 Nailar.
Ia kane ka phlim ba la thoh bad ba la direct hi da u Sangma, ka kyrteng tynrai ka dei, ‘Rimdogittanga’ kaba jrong 127 minit.
Kane ka phlim ba la pynmih da ka India, China, Switzerland bad Qatar ka la iohlad ban pyni ha ki tamasa pyni phlim bapawnam, kum ka Film Bazaar, Tokyo Talents (producer), bad BoostNL ha u snem 2019 bad Berlinale Talents (director) bad La Fabrique du Cinema ha u snem 2020.
Ka Rapture ka la ioh pdiang jingiarap pisa na ka Hubert Bals Fund – Script Development and Vision Sud Est – Production Fund ha u snem 2019. Ha u snem 2022, ka la shah jied ban ioh ia ka khusnam Doha Film Institute – Post-production Fund.
Katkum ka jingpynwandur jong u Sangma, kane ka phlim ka iathuh shaphang ka jingngeit biej bad ka jingsheptieng ha kaba ka jingphohsniew bad ka jingshisha ka don ia ka khana shaphang kawei ka shnong kaba ju mih ka jingsawa na meira-wew manla ka saw snem lyngba ka jingiathuh jong uwei u khynnah.
U nongshna ia kane ka phlim u ong, “ka jingrongnoh ka mih na ka jingsngew jong u shaphang ka jingsheptieng namarba u don ka jingpang byrie ha ki khmat. Kum u khynnah, nga la mad ia ka jingtieng shaphang ki nongrahbor ia ki khynnah kiba ju shang kylleng ka shnong ha ka por mynmiet. Ym don kaei kaei ruh kaba nga sheptieng eh ban ia ka jingdum jong ka miet. Manla ka miet, ki nongshong shnong ki ju pahara ia ka shnong.”
U la sakhi ruh ia kawei ka jingjia basngewsih halor ka jingshah bom shah tied jong uwei u bar shnong tang na ka daw ka jingshah kynnoh ba u dei u nongrahbor ia ki khynnah.
“Kane ka la ktah bha ia nga kum u khynnah, kaba bet ia u symbai jong ka jingiapher hapdeng ‘ki’ bad ‘ngi’. Da ka jingrongnoh, nga kwah ban pyndam noh lane ban kah noh ia u lain hapdeng ‘ki’ bad ‘ngi’, u la bynrap.
Kane ka phlim ka la shah jied ruh ban ioh pdiang ia ka The Green Pardo Award, ka khusnam ba la pynmih ha u snem 2022 ban rakhe shaphang ki phlim kiba iadei bad ka jingpynneh pynsah, ka mariang bad ka jingiadei bad ki jingthaw ba im.
U Director jong ka Locarno Film Festival u la jied 10 tylli ki Feature phlim bad ka prokram jong ki phlim lyngkot, ba la pynbna paidbah kum ka World lane ka International Premiere ha ka festival’s official sections, kaba kdew shaphang ka jingiadei hapdeng u briew bad mariang.
U Sangma u dei uba la pyndep ia ka Graduate na ka Satyajit Ray Film bad Television Institute (SRFTI), India, ha kaba u la pyntbit bha ialade ha ka Direction bad Screenplay Writing. Shwa ban ngam sha ka pyrthei shna phlim ula seng ia ka kompeni pynmih phlim, ka Anna Films, u la trei shipor bad ka National Film and Development Corporation Ltd (NFDC) haduh ar snem.
Ka phlim jong u, ba la ai kyrteng Ma.Ama ka la long ka phlim Garo ba nyngkong eh ban jop ia ka National Award, kynthup ha ka “Best Cinematography Award” ha ka 22nd Shanghai International Film Festival ha u snem 2019.
U la long u nongbishar ha kiba bun ki tamasa pyni phlim ha ka ri bad u dei ruh u Guest Faculty ha ka Film and Television Institute, Itanagar. U la long uwei napdeng ki nongseng ia ka Kelvin Cinema Festival bad u Artistic Director jong ka tamasa ba la pyni ia ki phlim lyngkot ha ka ri.
