Shillong, Naitung, 06: U Myntri Rangbah ka Jylla u Conrad K. Sangma ha ka sngi Palei u la ïathuh ba ka don ka jingtih bniah ban pynsdang noh ïa ka lynti Rel sha East Jaiñtia Hills District. Ha ka jingïakren bad ki lad pathai khubor, u Myntri Rangabh u la ong ïa ka projek shna lynti Rel Byrnihat-Shillong la hap ban pynsangeh noh na ka daw ka jingmih ki jingpyrshah kiba bun na ki kynhun bapher bapher.
“Ka la don ka jingïakren bad ka Sorkar Pdeng ba ka pisa kaba la mang na ka bynta ka projek shna lynti Rel Byrnihat-Shillong la hap ban kdat noh bad yn sa bhah noh sha ki projek na ka bynta kiwei pat ki zone lane sha kiwei pat ki bynta jong ka jylla ban plie ïa ka lynti Rel,” ula ong.
U la ong, “ka la don ka jingtih bniah ha East Jaiñtia Hills na ka bynta ban shna ïa ka lynti Rel kaba poi haduh ka shnong Khliehriat. Kata ruh ka shong ha ka jingïakren bad ki nongïalam shnong bad ki paidbah ryngkat bad ki kynhun bapher bapher.”
U Sangma u la ong, ba ka Sorkar India kan ym lah ban shu ap sah namarba ka lah ban shu pyndam noh ïa kane ka projek shna lynti Rel kaba pynpoi haduh Shillong bad ïa ka pisa yn sa ai noh sha kiwei pat ki Zone lada ka lad ka plie.
