Shillong, Nailur 04 : Kumba hynñiew ngut ki dkhot Hynñiewtrep Integrated Territorial Organization (HITO) ki la shah kem hadien ba ki la kawang maw ia ki Pulit bad ki Magistrate kiba khanglad ia ki ban tur paidbah sha Secretariat ha ka lah sngi U Blei.
Kane ka la jia hadien ba u President ka HITO u Bah Donbok Dhar u la shah khot hajir ha u investigation officer (IO) ha Sadar Police Station ha kaba iadei bad ka case ba la register pyrshah ia u ha u bnai Naitung hapoh ka Section 171 bad 34 IPC bad ka Section 105 jong ka MP Act kaba iadei bad ka jingphong Uniform iong da ki dkhot ka HITO. Ki Uniform iong ki dei kiba iasyriem ia ki Uniform ba la phong da ki Pulit Special Operation Team (SOT).
Ki Pulit ki la hap ban kawut lathi bad kawang da ki stun grenade hadien ba ki dkhot ka HITO kiba don da ki spah ngut ki la sdang ban kawang da ki maw ia ki pulit katba ki dang tur da ka bor sha Secretariat.
Ha kane ka jingiapynibor, u Deputy Superintendent of Police (Dy.SP) u la mynsaw.
Ha ka jingiakren bad ki lad pathai khubor u Superintendent of Police ka East Khasi Hills u Bah Sylvester Nongtnger u la iathuh, ha ka jingshisha, u Investigation Officer (IO) u la khot hajir tang ia u President jong ka HITO ban leit mih sha Sadar Police Station hynrei ia une u nongialam ka seng la synran da ki spah ngut ki dkhot.
“Hooid, ngi la shah ban rung shapoh thanat tang 5-6 ngut na ki, katba kiwei pat ki la ap shabar ka phalor. Hadien ba ngi la shim ia ki jingkren jong u, ma u ryngkat bad kiwei pat la pyllait ba kin mih noh na thanat,” ong u Bah Nongtnger.
“Haba ki la mih nangne, ngi sngewthuh ba ki kwah ban tur sha Secretariat ban leit kawang ia ki plakad ba ki la rah. Tang shu tip ia kata, la khanglad ia ki hakhmat ka Ophis DC da ki Magistrate bad ki Pulit,” u la ong.
“Tang shu poi ha kane ka jaka, ka jingiapynibor ka la nang jur, ki dkhot ka HITO ki la kawang da ki maw ia ki Pulit bad ia ki Magistrate bad pynibor ruh wat ia ki Pulit kynthei bad ki la kawang maw ruh wat ia u Dy.SP uba la mynsaw malu mala. Haba ngi iohi ia ka jingpynibor ngi la hap ban kawut lathi bad siat Tear Gas,” u la bynrap.
U SP u la pyntip ba ia mynta ki don 6-7ngut ki dkhot ka HITO kiba la shah kem.
Haba kylli,u la ong, “ka jingkhot hajir ka dei namarba ki phong da ki Uniform rong iong khlem ka jingioh jingbit. Dei na kata ka daw ba la register case bad la khot hajir ia u President sha thanat ban shim ia ka jingai jubab jong u.”
