Shillong, Nailar 04 : Ka Hynñiewtrep National Liberation Council (HNLC) ka la byrngem ban weng noh ia ka jingiakren iasuk bad ka Sorkar halor ka jingshah khot hajir u General Secretary-cum-Publicity Secretary u Bah Saiñkupar Nongtraw hakhmat ka Kashari watla ka jingïakren ïasuk ka dang iaid shakhmat.
Ka HNLC ka la dawa ruh ïa ka Sorkar ban weng noh ïa baroh ki jingpynngat kyndon ïa ki nongialam ka seng bad ong ruh ba ka Sorkar ka dei ban tyrwa ïa ka jingmap hynrei lym kumta ka HNLC ka lah ban weng noh ïalade na ka miej jingïakren ïasuk.
“Ka HNLC ka pynrem jur ïa ka sienjam ba la shim dang shen da ka Sorkar Jylla, khamtam ïa ka jingpynbna paidbah ban khot hajir ïa u Bah Sainkupar Nongtraw, u General Secretary ka HNLC sha Kashari wat hapdeng ba ka jingïakren ïasuk ka dang iaid shakhmat,” ong u Bah Sainkupar Nongtraw ha u kyrwoh ba la phah sha ki lad pathai khubor ha ka sngi U Blei.
“Kane kam dei shuh ka sien banyngkong ba ki nongïalam ka HNLC kynthup u Chairman bad u Finance Secretary, ki la shah khot hajir hapdeng ka jingïaid ka jingïakren ïasuk. Kum kane ka jingleh ym tang ba ka pynartatien ïa ngi ban shaniah ïa ka Sorkar hynrei ka lah ruh ban ktah ïa ka jingpyrshang ban wanrah ïa ka jingïapynbeit,” ula ong.
“Ka Sorkar Jylla ka la dawa ba ngan don lang ha ka jingïalang da kaba buh por ïa ka 30 tarik Nailur, katba ka Ministry of Home Affairs ha kawei ka liang, ka la pynkylla sohpdung ïa baroh ki nongïalam barangbah ka HNLC ba kin wan mih hi dalade,” ula ong.
“Ka HNLC ka la ban jur ba baroh ki nongïalam bad ki dkhot ba ehrang kin ym wan shakhmat tad haduh ba la pynurlong ïa ki jingdawa ka seng. Ngi kyntu ruh ïa ka Sorkar Jylla ban pynlong ïa ka jingïakren bad ka kynhun ba la ai jingbit da ka HNLC Central Executive Committee ba la ïalam da u Vice Chairman,” u la ong.
“Ngi dawa ba dei ban weng noh ïa baroh ki jingpynngat kyndon ïa ki nongïalam ka HNLC bad ban tyrwa ïa ka jingmap noh ïa ki. Khlem kine ki sienjam ba donkam, ki nongïalam jong ngi kin ym lah ban ïashim bynta ha ka jingïakren ïasuk. Haba ngi la aibor ïa u Vice Chairman bad ka kynhun ban mihkhmat ïa ki sha ka jingïakren, ka jingbym shimkhia jong ka Sorkar ka la sdang ban paw shai. Lada kane ka dang ïaibteng, ngim ym don lynti pat da kumwei hynrei ban weng noh na ka jingïakren ïasuk,” la iai ban une u nongialam ka HNLC.
U Bah Nongtraw u la ong, kumba ka paw, ym shym la don ruh kawei ka Peace Accord ne ka jingïateh kular ïasuk ha ka thaiñ Shatei Lam Mihng ka ban treikam, laitnoh tang ka Mizo Accord.
“Wat ka Instrument of Accession, kaba ka Sorkar jong phi ka la leh jubor ïa ka Bri jong ngi 76 snem mynshwa, ym pat shym la pyntreikam kumba ka long. Nalor kata, wat ia ka Standstill Agreement ba la ïasoi hapdeng ka Sorkar India bad ka Federation of Khasi States la shu pynkheiñ. Halor kitei ki nongrim, hato phi lah ban khmih lynti ïa ngi ba ngin ïa bteng ban shaniah ïa ka sorkar?” ula ong.
“Lada ka sorkar ka pyni ïa ka mon ban pynurlong ïa ki jingdawa ki jong ngi, kaba long kumjuh bad ka rukom leh jong ka sorkar India ha ka jingphiah ïa ka Jammu bad Kashmir, kumta ngi lah ban pdiang ban ai ka jingshaniah ïa ki bor sorkar. Ha ka 5 tarik, Nailar 2019, ka Parliament jong ka ri India ka la pynbna ba la pynsangeh ïa ka jingpyntreikam ïa ka Article 370 ha Kashmir. Hadien 86 sngi, ha ka miet jong ka 31 tarik u Risaw 2019 ka la phiah noh ïa ka Kashmir,” ong u Bah Sainkupar.
“Lada ka sorkar ka pyni ïa katei kajuh ka nongrim ban phiah noh ïa ka jylla Meghalaya bad ban pynbna ba ka Hynñiewtrep kan dei noh la ka jong ka jylla ha ka por kaba la buh kumba la leh ïa ka Kashmir, kumta ngin lah ban ai ka jingshaniah ïa ka sorkar. Ha kum kane ka khyllipmat, ngin ym donkam ïa kano kano ka jingkyrshan pisa ne kaba phi ju kdew kum ka “Rehabilitation Packages” na ka bynta ka HNLC,” u la ong.
“Kane ka jingïai bteng ban thombor ïa uwei pa uwei u nongïalam ka HNLC lyngba ka jingai notis ka dei ban ïoh ka jingshah kynthoh kaba khlaiñ na baroh ki liang hynrei ha kajuh ka por ngi kwah ban kren shai ba ngim tieng ïa ki aiñ kiba thombor ne ïa ka jingiap bad ngin ïai bteng ïa ka jingïaleh ka jong ngi khlem da pyndem ïa ka nongrim. Ka jingtieng kam ju don ha ka rukom treikam jong ka seng bad ka jingïakhun ka jong ngi ban rah atiar ka long kaba shong nongrim ha ka histori jong ka jingïakhih jong ngi,” ong u Bah Nongtraw.
Shuh shuh ka jingkhang ne banned da ka Ministry of Home Affairs (MHA) ïa ka Islamic Research Foundation (IRF) hapoh ka Unlawful Activities (Prevention) Act (UAPA) 1967 ka long kaei kaei kaba donkam ban kdew. Katei ka jingkhang ka la paw ba ka long kaei kaei kumba la kam da u Zakir Naik uba la kynnoh ba ki heh ophisar jong ka sorkar India ki la ïakynduh ïa u ban ailad da kaba suk ban ïaid ban ïeng bad ban weng ïa baroh ki case. Ka long kaba hap ban kdew ba u Zakir Naik ula shah khang pyrshah ha kiba bun tylli ki Ri. Ha kaba ïadei bad ka jingpynngat kyndon ka sorkar India ïa ka HNLC hapoh ka aiñ UAPA hapoh u pud u sam jong ka MHA, kumta kane ka la pynmih ïa ka jingkylli kaba kongsan, lada ka Sorkar u Modi ka lah ban pynjem ha kaba ïadei bad u Zakir Naik, balei ym shym la leh lang ïa kane kumjuh ïa ki nongïalam bad ki dkhot jong ka HNLC, kiba dang ïashim bynta ha ka jingïakren ïasuk bad ka sorkar?, la buh jingkylli ka seng.
“Ka HNLC ka ïengskhem ha ka nongrim ban pynurlong ban don ïa ka jingsuk kaba shirta bad ka jingpynbeit ïa ka kam saiñ pyrthei. Ngi kyrmen skhem ba ka Sorkar kan khmih bniah biang ïa ka rukom trei na ka bynta ban wanrah ïa ka jingmynjur lang da baroh,” la ong shuh shuh u kyrwoh.
