Shillong, Jylliew, 6: Arngut ki briew ki la shah kem katba ki dang pyrshang ban lute bad pynmynsaw ïa uwei u nongïaid lynti ha Nongrim Hills, Shillong ha ka sngi Thohdieng. Kane ka la jia ha ka por kumba 8.10 baje mynmiet ha kaba kine ki arngut ki la wan da ka Scooty rong iong bad leh ïa kane ka kam runar.
Ïa ki arngut kiba la shah kem la tip kyrteng kum u Kitbok Thabah, 27 snem ka rta na Golflink bad u Melvin Tongwah 22 snem ka rta na Lumshyiap, la ïathuh u SP ka East Khasi Hills u Bah Vivek Syiem ha u kyrwoh khubor.
“Hadien ba la ïoh bun ki jingujor na ki nongïaid lynti ba ki shah lute ha ki arngut ki briew ki bym lah ban ithuh kiba shong da ka Scooty rong iong, ka Special Team na Laitumkhrah Police Station ba la ïalam da ka OC Laitumkhrah, ka Insp. Lily Nongkhlaw ryngkat ki katto katne ngut ki nong Samaria babha la ïoh kem ïa ki briew katba ki dang pyrshang ban lute ïa uwei u nongïaid lynti da kaba dung da u screwdriver na ka kpoh, ha ka por kumba 8.10 baje mynmiet mynta ka sngi”, u la ong.
U la pyntip ruh ba mynta u snem la register ar tylli ki case ha Laitumkhrah PS pyrshah ïa ki halor ka jinglute ha ki ar tylli ki jaka, kawei ha ka 10.04.25 ha ka por 8.30 baje mynmiet hajan ka Bawri Mansion ha kaba ki la lute ïa ka pisa T.19, 000 katba kawei pat ka jingjia ka dei ha ka 3.06.25 ha ka por 7 baje mynmiet hajan ka Nagaland House ha kaba ki la lute ïa ka pisa T.5 hajar.
La ïoh jingtip ba ki la ju leh ïa kum kine ki kam ïa kiwei ruh hynrei ym ju don kiba wan shakhmat ban ujor. U Melvin Tongwah u dei uba la shah kem teng mynta u snem namar ka jingdonkti ha ka jinglute ïa ki briew ha kylleng ka thaiñ Polo bad la kem ïa u da ka Pasteur BH, la ong u SP.
