Shillong, Nailur, 19: Ha ka janmiet sngi Balang ha ka por kumba 7:30 baje janmiet katba ka kynhun Pulit jong ka Jowai PS ki dang ïaid pahara ki la ïohi ïa ki ar ngut ki briew hajan Thomas Jones Synod College, Jowai ïa kiba la suba jur ba ki donkti ha ki kam khaïi be-aiñ ïa u drok.
Ki Pulit ki la bat noh ïa kine arngut kiba la tip kyrteng kum u Sdangki Myrphet, 35 snem bad u Wandao Bareh, 42 snem kiba na ka shnong Panaliar, Jowai.
Ha ka jingtohkit bad talasi ïa ka met jong kine ki arngut, ki Pulit ki la lap pynban ïa u drok Heroin uba don ka jingkhia 5.1 gram ryngkat bad ka pisa kaba kot T. 31,730 hajar.
Ki Pulit ki dang pynlong ïa ka jingtohkit kaba bniah khnang ban lap ksai shuh shuh ïa ki kam jong ki ha kane ka kam khaïi drok.
