Shillong, ïaïong, 27: Ki Pulit ka East Khasi Hills District ki la kem sa ïa u dkhot jong ka Khasi Student’s Union (KSU) Central Body u samla Osternic Marbaniang, 34 snem ka rta halor ka jingshah pynïap jong ki ar ngut ki bar jylla ha ka shnong Ichamati ha ka 27 tarik, Lber, 2024.
Ki Pulit ki la kem ïa une u nongïalam ka KSU ha ka nohphai sngi jong ka sngi Saitjaiñ na ingsah jong u na Jaïaw Laitdom halor ka case ba la register ha Shella Police Station hapoh ka Section 302/34 Indian Penal Code (IPC) ha kaba u Ishan Singh bad u Sobir Dutta ki la shah pynïap ha ka shnong Ichamati.
Ka Kashari ka la aibor ïa ki Pulit ban set along haduh 6 sngi na ka bynta ban pynlong ïa ka jingtohkit pyrshah ïa u.
U kyrwoh ba la phah da u Superintendent of Police ka East Khasi Hills Rituraj Ravi u la ong, “shuh shuh, ngi kyrpad ïa ki paidbah ba kin pynneh ïa ka shongsuk shongsaiñ. Kino kino ki runar kiba pyrshang ban pynthud ïa ka shongsuk shongsaiñ kin shah pynshitom katkum ka aiñ.”
Tang shu ïoh jingtip halor kane, ki dkhot ka KSU ki la tur sha Sadar Police Station hynrei ki Pulit ki la khang noh ka khyrdop bad pynkhlaiñ ïa ka jingpahara ïoh ba ka mih kano kano ka jingkulmar.
Katba ki Pulit ki dang mih na phyllaw ka Sadar PS ban kit da ka kali ïa u samla Ostarnik Marbaniang sha Civil Hospital, Shillong na ka bynta ban leh ïa ka Medical Check-up la sakhi ruh ba ki dkhot ka KSU ki la leit synran lang tad haduh ka khyllipmat ba ki Pulit ki la rah ïa une u nongïalam ka seng ban tian bishar ha Kashari jong u District and Session Judge, East Khasi Hills District khnang ban pan jingbit ban set along na ka bynta ban pynlong ïa ka jingtohkit kaba bniah.
Haduh mynta ki Pulit ki la kem haduh saw ngut ki dkhot jong ka KSU halor ka jingshah pynïap jong ki arngut ki nongbylla tih maw ka shong Ichamati, East Khasi Hills kiba la tip kyrteng kum u Ishan Singh bad u Sudip Dutta. Ki bahaing hasem jong kine ki arngut kiba la shah pynïap ha ka jingmudui ejahar sha ki Pulit ki la teipop ïa ka KSU.
Ha ka 2 tarik mynta u bnai ki Pulit ki la kem shwa ïa arngut ki dkhot ka KSU South Khasi Hills Unit ba kynthup ïa u samla Shambor Shati bad u samla Meshadap Sohpen na Sohra. Nangta, ha ka sngi Baar mynta ka taiew, ki Pulit ki la kem sa ïa u samla Cleenstar Shabong na ka shnong Nongthymmai Pohktieh, Lane-5, Shillong. Ha kane kajuh ka sngi, ki Pulit ruh ki la kem ruh ïa u samla Gary Rinaldy Mawlieh, na Mawlai Mawroh Kseh halor ka jingshah tangon jong u nongbylla misteri bar jylla ha ki runar ki bym lah ban tip kat haduh ba u la khladnoh ha NEIGRIHMS Hospital.
U Superintendent of Police (City) Pankaj Kumar Rasgania u la pyntip ba u Cleenstar Shabong u donkti ruh ha ki 10 tylli ki case bymman, ha kaba la pynngat kyndon pyrshah ïa u tang ha kawei ka case.
Katba ha kaba ïadei bad ka case ba la rejistar ha Mawlai Police Station halor ka jingshah pynïap jong u Arjun Ray ha Mawlai Mawroh, u SP (City) u la pyntip ba u Gary Rinaldy Mawlieh u dei uba donkti shuh shuh sa ha ki 3 tylli ki case bymman ha kaba la pynngat kyndon pyrshah ïa u ha ki ar tylli ki case.
Ka Kashari ka la aibor ïa ki Pulit ban set along haduh 7 sngi ïa u Cleenstar khnang ba kin ïoh pynlong ïa ka jingtohkit kaba bniah katba ka Kashari ka la aibor ïa ki Pulit ban set along 12 sngi ïa u Gary Rinaldy ban pynlong shuh shuh ïa ka jingtohkit kaba bniah.
