Shillong, Risaw 31: Ki Pulit jong ka East Khasi Hills ha ka lah sngi U Blei ki la kem ïa u President jong ka Hynñiewtrep National Youth Front (HNYF) East Khasi Hills District u Bah Bless Dkhar halor ka jingkynnoh ba u donkti ban dawa pisa na ki trok kit mar.
Ki Pulit ki la ïathuh ba ka jingkem ïa une u nongïalam ka HNYF halor ka jingsaphriang jong ka Audio Recording ha ka rynsan Social Media ia ka jingïakren jong u Bah Bless Dkhar bad uwei u briew ba pynshisha ïa ka jinglum pisa jong une u nongïalam ka HNYF na ki trok kit mar ba un ïarap ban pyllait ba kin ïaid na ka Jingkieng Damsite.
Ïa kane ka jingïakren u Bah Bles bad uwei u briew uba ym shym la pynithuh la pynmih lyngba ka Audio ha kawei ka lad pathai khubor Electronic Media.
Ha ka sngi baar, ki Pulit ki la tian bishar ïa u Bah Bless Dkhar ha Kashari jong u District and Session Judge ka East Khasi Hills District hadien ba la kem ïa u na ka shnong Pohkseh, Shillong bad ka Kashari ka la aibor lai sngi kynthih ïa ki Pulit ban set ha Police Custody na ka bynta ban pynlong ïa ki jingtohkit kiba bniah.
