Shillong, Jylliew, 11: Ki Pulit ka Ribhoi District kiba la buddien ia ki jingioh shithi dawa pisa jong kiba bun ki briew, ki la iohkem ia ki lai ngut ki dkhot jong ka Sleeper Cell ka seng kieng atiar Hynñiewtrep National Liberation Council (HNLC) kiba donkti ban treikam sop sop ha shnong Mawhati-Umroi, Ri bhoi District bad ha nongbah Shillong.
U Superintendent of Police ka Ribhoi District u Jagpal Singh Dhanoa ha u kyrwoh ba la phah sha ki lad pathai khubor ha ka sngi Baar u la pyntip ba ia kine ki lai ngut la iohkem ha ka jingkhynra ha ka lah sngi U Blei.
Ia ka Sleeper Cell jong ka HNLC la khlieh da u Cyfrank Paul Pariat, 25 ka rta na ka shnong Ummat, uba bat ia ka kyrdan Self Styled Commander jong ka HNLC, la ong u SP.
“Ma u, (Cyfrank Paul Pariat) bad ka kynhun ki la sam bun tylli ki shithi dawa pisa ha ka kyrteng jong ka HNLC bad byrngem ruh ia kiba bun ki briew ban siew ia ka pisa ba la dawa lym kumta kin mad ia ka jingeh,” la bynrap shuh shuh u SP.
Ki Pulit ka Special Team jong ka Police Headquarter bad Ribhoi District Executive Force (DEF) ha ka jingkhynra ha ka lah sngi U Blei ki la iohkem ia u Cyfrank Paul Pariat, bad arngut ki dkhot, kata, u Kitbok Mujai, 23 snem ka rta na ka shnong Ummat, Ribhoi Distirct bad u Barnabas Lyngdoh, 49 snem ka rta na ka shnong Khyndewsoo, Ribhoi District.
U SP u la pyntip ba kine ki lai ngut ki dei kiba ju donkti ban pynrung dkhot, ban lum pisa na ka bynta ka seng HNLC kaba la shah ñiew beain hapoh ka Unlawful Activities (Prevention) Act ki la leit sha ka ri Bangladesh ha u snem baladep ban ioh jinghikai pyntbit.
Ha kaba iadei bad kane, ki Pulit ki la register case ha Umiam Police Station hapoh ka Section 120B/506 Indian Penal Code bad ka Section 10/13/17/18 jong ka Unlawful Activities (Prevention) Act bad ka jingtohkit mynta ka la iaid shakhmat ban lap ksai shuh shuh ia ki briew kiba lah ban dei ki dkhot ne kiba don jingiadei bad ka seng HNLC.
“La kyrpad ia ki paidbah ba kim dei ban ngop ha ki jingshah dawa pisa beain jong ka HNLC bad ba kin pyntip marmar sha ki Pulit lada don kino kino kiba dawa pisa be-aiñ,” la kyrpad u SP ka Ribhoi.
