Shillong, Risaw 15: U MDC ka BJP na Tura u Bernard N. Marak u la phah da ka jingthoh sha u Myntri Rangbah ka Jylla u Conrad Kongkal Sangma ban bthah ïa ka Executive Committee ba la ïalam da NPP ha Garo Hills Autonomous District Council (GHADC) ba kan sangeh noh mardor ban kheiñ ïa ka BJP kum ka Liang Pyrshah bad ban ïasam marbiang ïa ka bhah jong ka Tied bad Untied Grants ha ki Constituency ba la mihkhmat da ki MDC ki bym dei na ka NPP.
Ha ka shithi ba la phah sha u Myntri Rangbah ha ka sngi u Blei, u Marak u la ong, “nga kyrpad ïa phi ba phin shimkhia ïa kane ka kam bad ban bthah ïa ka Executive Committee jong phi ba phin sangeh mardor ban ñiew ïa ka BJP kum ka Liang Pyrshah bad ban ïasam marbiang ïa ka Basic Grants (Tied bad Untied) khnang ba ki paidbah kin ïoh ïa ki jingmyntoi.
U la kynnoh ba ka Executive Committee ba ïalam da ka NPP ha GHADC ka la bhah tang 15 lak sha ka Tura Constituency nalor ba ka dei ruh ka Constituency ba la mihkhmat da u Myntri Rangbah.
“Nga dei u MDC ka BJP bad ka NPP kaba ïatreilang bad ka BJP ha Delhi bad ha ka jylla hynrei ha GHADC, ka NPP ka la leh shiliang khmat ïa ka BJP ha baroh ki jait kam wat ha kaba sam ïa ki song pynroi ba la mang da ka Sorkar BJP na Delhi lyngba ki Rural Local Bodies (RLBS) hapoh ka Fifteen Finance Commission (XV FC),” ong u Marak.
Da kaba pynpaw ba ka Tura Constituency ka dei ka Constituency kaba heh napdeng ki Constituency kiba hap hapoh ka jylli jong ka GHADC bad kaba don kham bun ki nongthep vote, u Marak u la ong, “ka jingleh shiliang khmat da ka Executive Committee ba la ïalam da ka NPP ka la pynduhnong haduh katta katta ïa ki paidbah jong ka Tura ïa ki song jingïarap ba la mang da ka Sorkar Pdeng.”
Shuh shuh u la kynnoh ba ka Work Order ba la ai da ka GHADC ka long kaba rit ha kaba la mang pisa tang T.15 lak bad kane ka long jingpynkheiñ ïa ki kyndon jong ka XV FC.
“Ka jingai duna shaba palat ïa ka bhah ka dei ka jingpynkheiñ ïa ka hok katkum ka Riti Synshar Paidbah jong u nongmihkmat ba la jied da u paidbah namar ba ka pynduhnong ïa ki paidbah jong ka Constituency ba u mihhmat,” u la ong bad bynrap, “ka Tura ka dei ka Seat kaba kongsan bad ka don palat 30 tylli ki shnong bad nga kwah ban ïaiban ba ki paidbah ki dei ban shah pynduh ïa ka hok. Ka Tura Constituency ka la shah pynduhhok ha ki por ba ladep bad ka la ïoh tang T.10 lak na ka Tied bad Untied Fund na ka Executive Committee barim ba la ïalam da ka NPP.
“Namarkata, nga kyrpad rit ïa phi ban bthah ïa ki MDC jong phi ha GHADC ban sam marbiang ïa ka bhah. Kaba ar, phin kyrpad ban pyllait ïa ka song pisa kaba ladei ban siew sha ka GHADC da ka Sorkar Jylla na ka jingïoh lum khajna bad kiwei kiwei namar ba na ka GHADC ka la nang ngam mynta hapdeng ka jingdapram hynrei haduh mynta la 31 bnai kam pat lah satia ban siew wat ïa ka tulop sha ki nongtrei. Nga kyrpad ïa phi ban siew ruh ïa ka bhah thung dieng ba la ai sha ka Jylla ha ki lai snem ba ladep lyngba ka jingmynjur ba la ïasoi da ka ANVC bad ka ANVC-B namarba la mang kyrpang ïa ka tnat Forest jong ka GHADC, ym sha ka jylla. Pyllait noh mardor ïa ka bhah ba la ïoh lum khajna na ka Motor Vehicle Taxes sha ka GHADC namar ba haduh mynta ka Sorkar Jylla kam pat pyllait ïa ka pisa da ki snem,” la ong shuh shuh u Marak.
