Shillong, Naitung, 18: Ka PFR Football Academy kaba long kawei na ki shlem ai jinghikai ia ki khynnah ha ka jingialehkai phutbol, ka la shah khot sngewbha ban iashim bynta ha ka Under-15 Gold Cup National Football Championship ka ban sa long naduh 21 tarik haduh 23 tarik Naitung, 2023 ha West Bengal.
Haba ia kren bad u President jong ka Academy, u Bah Franky Kharumnuid u la ong ba kum ka Academy ka dap da ka jingkmen kaba khraw hadien ba kane ka Academy ka la ioh ia ka jingithuh wat haduh ki nongpyniaid kiba na shabar ka jylla lyngba ka jingshah khot ban iashim bynta ha kane ka lympung National Level kaba long kawei na ki rynsan kaba ki khynnah jong kane ka Academy kin ioh ia ka lad ban pyni ia ka sap ka phong jong ki ha ka National Level.
U la ong, kan ruh ka jingai mynsiem ia ki khynnah haba ki ioh ia ka lad ban ialehkai ia ki lympung ialehkai shabar na ka jylla namar dei ha kum kine ki lympung kiba heh kaba ki khynnah kin sngewthuh kumno ba kin nang lah ban trei shitom ban pynjanai ialade na ka bynta ban pynlong ia kane ka jingialehkai kaba ki ieid kum ka lad jingkamai jong ki ha ki khyndiat snem ki ban sa wan.
Ia kane ka kynhun yn ialam da u Bah Tyngshainlang Kharlyngdoh kum u Head Coach bad u Bah Franky Kharumnuid kum u Team Manager.
Kane ka kynhun ka mih na ka Meghalaya ha ka 20 tarik mynta u bnai.
Na ka liang jong ka Management ka kitbok kit rwiang ia kane ka kynhun bad kyrmen ba kin ioh kheit ia u soh jong ka jingjop ha kane ka lympung.
