Shillong, Nohprah, 16: Ka BJP Meghalaya Mahila Morcha ha ka sngi Saitjaiñ ka la pynrem jur ïa ka jingshah pynïaid lyngkhuid kawei ka kynthei riewlum ha ka shnong Belgavi, Karnataka.
U National President jong ka BJP u Jagat Prakash Nadda u la pynrem ur ïa kane ka kam runar bad thung ruh ïa ka Fact Finding Committee kaba san ngut ki dkhot ban leit jurip ha ka jaka ba kawei ka kynthei riewlum ka la shah pynïaid lyngkhuid. La bthah ïa ka komiti ban phah kham kloi ïa ka kaiphod sha u National President jong ka party.
Ka State President jong ka Meghalaya BJP Mahila Morcha ka Kong Sukhi Pariat ka la kynthoh halor kane ka jingjia da kaba ong, “ka Meghalaya BJP Mahila Morcha ka pynrem jur ïa kane ka jingleh riewkhlaw pyrshah ïa ka kynthei riewlum. Kane ka kam riewkhlaw pyrshah ïa ka burom jong ka kynthei ka long pyrshah ïa ki kyndon jong ki riewshai bad ka long kaba pangnud ïa ki nongshong shnong ban pyrkhat, ka paw shai ba ki kynthei ki long ki bym donbor ha ka jylla ba la synshar da ka Congress.”
“Ka Sorkar Jylla ka dei ban shim ïa ka jingkitkhlieh namarba ka pynshlur ïa kum kine ki runar bad kiba don ïa ka jingmut jingpyrkhat kaba dang dum, ki nongleh kam bymman ki dei ban shah tian bishar hakhmat ki bor jong ka aiñ bad ka hok ka dei ban ieng rasong,” la bynrap ka Kong Pariat.
“Ngi dkhot kynthei jong ka BJP, ngim lah ban pdiang kum ïa kine ki jingjia kiba mynta ki long tang ki nongsoi ha ki manla ki jylla ba la synshar da ka Congress. Ka party jong ngi kaba kyntiew sha ka shukit President jong ka ri ïa ka kynthei riewlum bad jied ruh ïa u riewlum kum u Myntri Rangbah jong ka jylla,” ka la ong.
“Ha kawei pat ka liang, ngi don ki seng saiñpyrthei kum ka Congress kiba don ïa ka jingkhim jingmut ha ka pyrkhat pyrdaiñ ba ki kynthei bad ki riewlum kim don jingshngaiñ ha ki jaka kiba hap hapoh ka jingsynshar jong ki. Nga kyrpad ïa ki paid nongthep vote ba kin ai jingsneng ïa ka Congress ha ka elekshon Lok Sabha. Kumba u Myntri Rangbahduh ka ri u Narendra Modi u ong, “Congress Mukt Bharat, ka ri India kaba laitluid na ka Congress, ka dei ban urlong,” ka la pynkut.
