Shillong, Nohprah, 16: U President jong ka Meghalaya Retired Deficit School Teachers Assocation (MRDSTA) u Babu E.D Nongsiang ha ka sngi Saitjaiñ u la ong ba ka Sorkar Meghalaya Democratic Alliance (MDA) ba la ïalam da ka National People’s Party (NPP) kam dei ban khanglad ïa ki nonghikai ba kin ïashim bynta ha ka saiñpyrthei ne wat ban ïakhun ïa ka elekshon lada ka Sorkar Jylla hi kam pat lah ban pynbiang lut ïa baroh ki jingsiew jingtda kumba ka leh ïa ki shakri Sorkar. “Kumba ka leh ka UGC hapoh NEHU ki shah ïa ki nonghikai ba kin ïakhun elekshon tangba ki hap ban shim shuti la kumno kumno shi snem, lada ki jop ki la leit sha ka kam nongmihkhmat bad lada ki rem ki leit phai biang sha University,” ong u Babu Nongsiang bad bynrap, “ngi ruh kham mynshwa ngi long kumta, lane, ka rul jong ka Sorkar kam ong shai ïa ngi ki nonghikai skul Deficit namarba ka baibam tymmen ruh ngim ïoh, ka siew ka tda ha ka pang ka shitom ruh ngim ïoh bad kiwei kiwei ruh ngim ïoh bad ngi ong ba dei ban shah. Ki shah baroh shikatto.”
“Dei tang mynta ar snem ne lai snem eiei, ngi ïohi ïa kato ka aiñ kaba ym shah shuh ban ïaleh elekshon (ïa ki nonghikai). Lada kim pat lah ban pynbiang ïa ki jingdonkam kumba ki pynbiang ïa ki nongtrei Sorkar, ka Sorkar ka dei ban shah ïa ki (nonghikai) ban ïaleh Elekshon namarba ki nonghikai ki dei hi ma ki, kiba hikai, kiba pyrkhat ïa kiei kiei na ka bynta ka jylla bad ka ri. Lada ki (nonghikai) ïashim bynta ha ki seng saiñpyrthei ruh kan biang bha,” u la bynrap.
Kum ban shu pynkynmaw hangne, ka Ïingbishar Meghalaya High Court lyngba ka Single Bench u Justice HS Thangkhiew ha ka 5 tarik, Nohprah 2022 bad kumjuh ka Division Bench ba kynthup ïa u Chief Justice Sanjib Banarjee bad u Justice W. Diengdoh ha ka 22 tarik Nailar 2023 ka la pyndam noh ïa ka hukum ba la pynmih da ka Sorkar Jylla ha ka 23 tarik Lber 2021 bad kumjuh ki kyndon ka Meghalaya State Education Policy 2018 kaba khang ïa ki nonghikai Kolej kiba hikai ha ki Aided Institution ne ki Kolej kiba ïoh jingïarap na ka Sorkar ba kin ïakhun ïa ka Elekshon ne ban shim bynta ne kitkam ha ki seng saiñpyrthei da ka jingujor mokotduma jong ka kynhun ki nonghikai ba kynthup ïa u Brightstarwell Marbaniang, u Dr. Batskhem Myrboh bad kiwei.
Ka Sorkar Jylla ka la ujor sa sha ka Ingbishar Supreme Court hadien ba ka la shah rem arsien ïa ka mokotduma kaba la ujor pyrshah da ka kynhun ki nonghikai kolej ba kynthup ïa u Bah Brightstarwell Marbaniang bad kiwei pat, ka kashari jong ki arngut ki Nongbishar jong ka Supreme Court ka Justice Hima Kohli bad u Justice Ahsanuddin Amanulla ha ka 11 tarik, mynta u bnai, ki la shong bishar ïa kane ka mokotduma ha kaba u Bah Brightstarwell Marbaniang ruh u la leit ban sakhi da lade ïa ka jingshong bishar ïa ka mokotduma kaba ma u ryngkat kiwei pat ki para nonghikai kiba la shah ujor.
Haba shong bishar kane, ka Kashari ka la rai ba ïa kane ka mokotduma yn shim bishar lang ryngkat bad kawei pat ka mokotduma na Kerela namar ka don ka jingïasyriem bad kane ka mokotduma ba ka Sorkar Jylla ka la ujor pyrshah ïa ki nonghikai Kolej hadien ba ka Ingbishar Meghalaya High Court ka la pynksan ba ki nonghikai Bolej ki lah ban ïa shim bynta ha ka kam saiñ hima sima kata ban long ki dkhot jong ki seng saiñpyrthei.
Ka Kashari ka la pynmih ïa ka hukumba ki nongshah shah ujor, kata, ka kynhun jong u Bah Brightstarwell Marbaniang ban File ïa ka Counter affidavit hapoh saw taiew.
Shuh shuh ka Kashari ka la pynmih hukum, lada ki kwah ban File ïa ka Rejoinder Affidavit hapoh ar taiew hadien ba la dep ban File ïa ka Counter Affidavit.
Ha kane ka jingïaleh mokotduma na ka liang jong ka Sorkar ki don 7 ngut ki Muktiar ba kynthup ïa u Advocate General u Amit Kumar, u Avijit Mani Tripathi, ka Rekha Bakshi, Aditya S. Pandey, ka Shaurya Sahay bad u Upendra Mishra. Katba na ka liang ka kynhun jong ki nonghikai la mihkhmat da ki san ngut ki muktiar ba kynthup ïa u Rajiv Kataria, ka Debjani Das Purkayastha, u H.R. Nath, u James Hitler Mawphiang bad ka Anu Gupta.
Lah ruh ban kdew, katkum ka Code of Professional Ethics ïa ki nonghikai kolej ka University Grants Commission (UGC) ka pynshlur ba kin tynrong lem ïa ka khia ka shon ha ka imlang sahlang bad ban ïarap ha kaba kit lyngkor ha ka synshar khadar ne Public Office kaba u paidbah u bynshet.
