Shillong,Lber, 14: Uwei u samla uba la tip kyrteng kum u Kyrshandame Talang, 29 snem ka rta uba sah ha ka shnong Mupliang, West Jaintia Hills District u la shah pyniap dusmon ha ki runar ki bym lah ban ithuh ha ka shnong Mosdai, kaba don markhap bad ka shnong Mukhla bad Myrjai bad ia ka met ba la shah sloit lyngkhuid la lap ha ka 12 tarik u Lber, 2024 najan ka lyngkha kaba don ha ka shnong Mosdai.
Katkum ka ejahar ba la mudui sha ki Pulit jong ka Ummulong Police Beat House, West Jaintia Hills District da ka kmie ka Kong Lakmon Talang, ka la ong ba u khun jong ka, u Kyrshandame Talang ha ka 10 tarik u Lber, 2024 u la iadih kiad lang bad la ki paralok ha kawei ka dukan kaba don ha ka shnong Mosdai bad u la mih shwa marwei na dukan kiad khlem da iathuh ia la ki paralok. Hynrei ha ka 12 tarik u Lber, 2024 la lap ia ka metiap jong u na ka lyngkha kaba jngai kumba 500 mitar na ka dukan die kiad.
Ka Kong Lakmon Talang ka la kyrpad ia ki bor Pulit ban tohkit bniah bad ban thwet ia ki briew kiba donkti ha kane ka kam bymman bad ban pynshitom ia ki katkum ka ain.
