Shillong, Nailar, 02: Lai ngut ki briew, kiba thmu ban thaw ïa kawei ka kynhun Gang lute pisa na kiba bun ki bynta jong ka rilum Garo ki la shah kem ha ki Pulit ryngkat bad ki pistol halor ka jingkynnoh ba ki dei kiba donkti ban pynïap ïa kawei ka kynthei ha ka shnong Jadigittim kaba hap hapoh ka South Garo Hills District.
Ïa kine ki lai ngut la ithuh kyrteng kum u David R. Marak ba ju khot sit u Bitbit na Kacharipara, Goalpara, Assam, u Demen R. Marak bad u Sainara R. Marak na Bajengdoba, North Garo Hills, la ïathuh ki Pulit.
Ha ka jingtohkit, ar tylli ki tiar siat pistol, ar tylli ki wait bad kawei ka tari la ïoh kurup na ka met jong kine ki lai ngut kiba ju pyndonkam ha kaba leh ïa ki kam bymman, la ong ki Pulit.
Ki Pulit ki la ïathuh ba kine ki lai ngut kiba la shah kem ki la thmu ban thaw ïa kawei ka kynhun Gang ban lute ha baroh kawei ka rilum Garo.
Lah ban kdew hangne ba la thaw ïa ka Special Investigation Team (SIT) ban ïarap ïa u Investigating Officer (IO) ba la shimti ban tohkit halor ka jinglap ïa kawei ka metïap jong kawei ka kynthei ha ka shnong Jadigittim ha ka 30 tarik, Jylliew mynta u snem.
La register case ïa kane ka jingjia hapoh ka Section 376/302.
Ka SIT lyngba ka jingpyndonkam ïa ki kor ki bor ka la lah ban ithuh durkhmat ïa ki lai ngut ki runar kiba donkti, la ong ki Pulit.
