Shilong, Jylliew 05: Ki Pulit ka Ribhoi ha ka sngi Balang ki la ioh ban pyllait im ia ki lai ngut ki rangbah na Ri-Bhoi kiba la shah rah bor ha ki runar ha ka jylla Assam katba ki dang thmu ban leit thied puh shilum JCB.
Kine ki lai ngut ki la lait im lyngba ka jingujor jong ka Kong Kirit Dohtdong sha ki Pulit ka Ribhoi hynnin ka sngi Baar ba u kurim jong ka ryngkat ki ar ngut ki paralok jong u, ki la shah rahbor ha ki runar.
Ka Kong Kirit Dohtdong na ka shnong Mawlang Ri-Bhoi ka la ujor sha ki Pulit ba u kurim u Bah Ïohborlang Kharsati ryngkat ki paralok ïa kiba la tip kyrteng kum u Kostarwell Shylla na Lumdaitkhla Bhoirymbong bad u Samsul Ali na Byrnihat ki la leit sha Guwahati ban leit thied puhshilum JCB, hynrei dei ha ka por 4:00 baje eiei janmiet ka la ïoh ka phone call na u kurim ba ma u bad ki paralok ki la shah rahbor ha ki runar bym lah ban ithuh bad dawa pisa haduh 7 lak tyngka ban pyllait biang ïa ki.
Mar mar ki Pulit ka Ri-Bhoi mynta ka sngi Balang ha ka por 9:00 baje eiei mynstep ki la hiar sha Nalbari District, Assam hadien ba ka jaka pyni ba da u kurim jong ka Kong Kirit u don bad na ka liang ki Pulit ki la pyntip ruh sha ki Pulit jong ka Nalbari District
Dei ha ka por kumba 3:30 baje noh phai sngi la ïoh jingtip lyngba u Officer Inchagre jong ka Mukulmua Police Station ba ki la ïoh ban kem ar ngut ki briew kiba suba ba ki dei kiba donkti ha ka jingrahbor ba kynthup ïa u Samsul Hoque bad u Abdul Aziz kiba dei na Nalbari District, Assam ryngkat kawei ka kali Ignis rong Blue ka bym don registration number kaba ki la pyndonkam.
Ha ka jingtohkit jong ki Pulit, u Samsul Hoque bad u Abdul Aziz ki la phla ba dei ki dei kiba donkti ban rahbor bad ki la ai ruh ïa u number phone jong uwei pat uba donkti ha kane ka kam. Mar mar ki Pulit ki la buddien ïa u number phone hadien ba ka jaka ka pyni ba u don ha Tihu National Highway ha kaba ki la pyntip noh sha Tihu Police Station ban leh ïa kaba donkam.
Hadien kumba katto katne por ki Pulit ki la ïoh jingtip ba ki lai ngut kiba la shah rahbor ki la kynthih najrong ka kali ba ki shah rahbor, hadien ba u runar ba ñiah ïa ka kali u la pynphai biang shadien ïa ka kali namar ka jingdon jong ki Pulit kiba la pynap shrip ha surok.
Ki Pulit ki la rah noh ïa ki lai ngut sha thanat, hynrei ki runar ba la rahbor ki la ïoh ban phet krad na katei ka jaka bad ki Pulit ki bteng ban pynlong ia ka jingthwet kaba jur ban ïohkem ïa ki runar.
