Shillong, Jylliew, 05: Ki shnat treikam jong ka Khasi Student Union kiba la rakhe ïa ka sngi pynneh mariang (World Environment Day) ha ka sngi Balang ki la thung haduh 1050 tylli ki tynrai dieng ha kylleng ki shnong ha ri Khasi bad Jaiñtia.
Ka Environment Cell jong ka KSU ka sngewkhia shikatdei eh halor ka jingkylla jong ka mariang khamtam ka suiñ bneng ha kine ki sngi. Ka jingduna u slap, ka jingshit kyrang bad kiwei ki jingkylla ka ktah bha ïa ka jingim ki briew hangne ha pyrthei. Ha Ri Khasi ka jingshit kyrang lyngba ka Global Warming ka pynjur ïa ka jingmih jynhaw um ha kaba ki um ki wah ki tyrkhong kloi kaba ktah pat ïa ka jingduna ha ka umbam umdih, ka rep ka riang bad ka jingtyrkhong ki shnong ki thaw, ong u kyrwoh na ka KSU ba la phah da u Environment Secretary u samla Shiningstar Kharbihkhiew.
Ka jingduna sa u slap ruh ka dang pynshyrkhei shuh shuh ïa ka jingkyrduh um. Kumta donkam ban pynim biang ïa ka mariang da baroh ki nongshong shnong ka jylla da kaba pyrkhat thymmai ha ka rukom sngew ïa ka mariang, kata ban pynkhie im biang ïa ka bad ban pynkhlain shuh shuh ïa ka khnang ban shgaiñ ka lawei ka Ri, la ong u kyrwoh.
Ha kane ka sngi, ka KSU Umpung Unit ryngkat ki khynnah skul bad ki nonghikai skul ki la thung ïa ki tynrai dieng ha ka shnong Umpung, South West Khasi Hills District. Kane ka Unit ka la thung kumba 100 tylli ki dieng.
Ka KSU Upper Shillong Circle ryngkat ka KSU Sawmer Unit ha ka jing don ryngkat ki Self Help Group na ka shnong sawmer bad ka skul Sawmer Presbyterian Secondary School sawmer ki la thung 50 tylli ki tynrai dieng.
Ka KSU Thangrain Unit, West Jaintia Hills District ka la thung 100 tylli ki tynrai dieng hapoh ka shnong Thangrain.
Ka KSU Laban Circle ka la thung 400 tam tylli ki tynrai dieng ha khlaw Riat Laban bad ha ki skul kiba don hapoh Laban Pyllun ryngkat ka jingdonlang jong u Rangbah Shnong ka Kynjat phutbal Bah Shepher Wahlang, u Secretary Shnong jong ka Madan & Riat Laban Bah Rupert G. Marbañiang ha kaba la sam ruh ïa ki tynrai dieng sha ki katto katne ki skul kiba don hapoh u pud treikam ka Laban Circle.
Ka KSU Mawlai circle ka la thung ïa ki tynrai dieng kumba 300 tynrai ha ka shnong Umrynjah ryngkat ka jingïatreilang bad ka Umrynjah Secondary School ba la sakhi lang da u Secretary jong ka School Managing Committee u Babu K. Thangkhiew, u Secretary ka shnong Umrynjah Bah L.kharshiing bad kiwei kiwei.
Ha East Jaiñtai Hills ka KSU lyngba ka Environment Cell ryngkat bad ka shnong Rymbai lem bad ka tnat PHE ki la thung 100 tylli ki tynrai dieng hajan tyllong um ka shnong Rymbai ka jaka kaba kyrteng Phe Phe.
Shwa ban thung ïa ki tynrai dieng, la pynlong ïa ka jingïalang ba lyngkot ba la ai jingkren na u SDO ka tnat PHE East Jaintia Hills, na u Rangbah Shnong ka Rymbai bad na u samla Phanuel Tongper Environment Secretary KSU EJHD.
Ka KSU ka la ïathuh ba ka sa ïai bteng ha kane ka taiew ban thung shuh da ki spah tylli ki tynrai dieng ha kaba ki tnat treikam jong ka seng ha kylleng ka Bri u Hynñiewtrep kin sa leh ïa kane ka bynta.
