Shillong, Lber 21: Uwei u nongtrei jong ka kompeni na ka jylla Uttar Pradesh la kynnoh ba u la shah rahbor na ki briew ki bym lah ban ithuh na Karukol Siju, South Garo Hills District, ong ki Pulit ha ka sngi Palei.
Haduh mynta ym pat lah satia ban ioh jingtip shaphang u Akhilesh Chauhan, 50 snem ka rta uba la shah rahbor ha ka por mynstep ha ka 20 tarik Lber, la ong ki Pulit.
U Chauhan u dei uba trei kum u Foreman bad kawei ka kompeni ba la tip kyrteng kum ka R.K. Singh Construction Company bad u dei uba trei ia kawei ka jingkieng ha surokbah National Highway-217 ha ka shnong Rongdik, ha Karukol kaba hab hapoh ka Siju police station.
“Ka jingthwet ban lap dien ka dang bteng hadien ba ngi la ioh jingtip shaphang kane ka jingshah rahbor. Ngi dang trei shitom ban lap dien ia u lanot,” ong u SP ka South Garo Hills u Shailendra Bamaniya.
Haba iathuh katkum ka jingpyntip jong u Manager ka Compeny, u Bamaniya u la ong ba u Chauhan u la shah rahbor ha ki briew ki bym lah satia ban ithuh durkhmat kiba la rung jubor ha ka jaka trei ban wad umphniang diesel da kaba ai daw ba ka kali jong ki ka la lut umphniang.
“U Chauhan katba u dang leit peit ia ka top buh umphniang diesel, u la jahrngai khlem iohi shu bad ki briew ki bym lah ban ithuh durkhmat ruh ki la jah lang,” u la bynrap.,
Ha kaba iadei bad kane, ki Pulit ki la register case bad ka jingtohkit ka dang iaid shakhmat.
