Shillong, ïaïong 17: Lai ngut ki nongtuh kali na jylla Assam ki la shah thang im ha ka khlaw kaba ha East Garo Hills District ha ka step jong ka sngi balang. Katkum ka jingïathuh jong ki pulit la ïathuh ba ka la don ka jingsuba ba kadei ka kynhun jong kiba tuh kali kiba la leh ïa kane ka kam.
Arngut na kine kiba la shah thang im ki dei kiba la tip kyrteng kum u Zahidul Islam bad u Jamor Ali.
“Imat kane ka dei ka kam tuh kali bad ka kynhun ki nongtuh,” ong u SP ka East Garo Hills Bah SA Rynjah.
U la ïathuh ba u Zahidul Islam u dei uba ju donkti ban tuh kali na Dudhnoi bad Krishnai bad u dei ruh uba case NBWA pyrshah ïa u ha Krishnai PS. Katba u Jamor Ali u dei u ba donkti ban tuh masi ha Matia PS, Assam.
Ka khubor na ki Pulit ka ïathuh ba ha ka 16 tarik mynta u bnai ki la ïoh ïa ka jingujor ba shu pyntip ba u Jamor Ali (35) ryngkat lang bad u nongñiah u Noor Ahmed bad u Zahidul Islam (25) ki la mih na ka la ïing ha ka janmiet 15 tarik mynta u bnai ban wan sha Meghalaya ban leh ïa ki kam kiba kongsan sha Meghalaya.
Ka khubor ïa ka ïathuh kitei ki briew na Assam ha ryngkat bad u nongñiah jong ka kali ba ki shim wai, ki la shah pynïap bad shah thang haduh bym ithuh shuh ha ka thaiñ Rongmil, kaba jngai kumba 15 Km na Rongjeng, East Garo Hills.
Ïa kine ki met ïap ba ladep thang la tep ha kawei ka thliew ha ka thaiñ Rongmil.
La ong ba kane ka jingpynïap kaba la jia tang arsngi shuwa ka ilekshon, ka la pynsuhjer ïa ki nongshong shnong jong ka thaiñ.
Shuh shuh ka khubor ba la ïoh na ki Pulit ka ïathuh ba kine ki lai ngut ki briew ki la mih na Goalpara ha ka step sngi Ba-ar bad ka jingïakren briew ba khatduh eh jong ki, lyngba ka phone ka dei ha ka por 6 baje mynstep ha ka por ba ki phone ïa la ki bahaïng ba ki dang ïabam jingbam step ha surok hadien ba rung sha East Garo Hills lyngba ka surok Damra-Dainadubi-Wageasi sha Rongmil.
Ka khubor ka la ïathuh ba ki bahaïing jong ki, ki la khuslai hadien ba baroh lai ngut kim shym la phone shuh baroh shisngi bad kumta, ki la pyntip mar mar sha ki Pulit ba kin ïarap wad lem.
Ha kaba ïadei bad kane ka jingjia ki Pulit ha ka jingtohkit, ki la lap ïa ka kali maruti swift kaba ki shimwai na kawei ka khlaw siej ha ka thaiñ Rongmil bad kane ka kali ka la ingkhong khait na ka jingshah thang.
Ki Pulit kila pynjur ïa ka jingtohkit ha kane ka jaka bad shem ba kane hi ka dei ka jaka ba la pynïap ïa kine ki briew bad ki runar ki la thang ïa ka met ha shuwa ba kin tep ha kawei ka thliew.
La ong ba artylli na kine ki metïap la tep lang ha kawei ka thliew katba kawei pat la lap na kawei ka thliew ïa kaba la suba jur ba ka dei ka met jong u nongñiah jong ka kali.
