Shillong, ïaïong, 17: U MDC barim jong ka Umsning Bah Donkupar Sumer ha ka sngi Balang u la mudui da ka ejahar pyrshah ïa u CEM barim ka KHADC u Bah Ardent Miller Basaïawmoit, uba mihkhmat mynta ïa ka Nongkrem Constituency, halor ka jingkynnoh ba u donkti ha ka jingthung, shukor, soi thok bad pyndonkam bakla ïa ka pisa ha kaba ïadei bad ka jingthied ïa ka jaka na ka bynta ka Khasi Hills Autonomous District Council (KHADC).
Ha ka ejahar ba la mudui ha Lumdiengjri Police Station, u Bah Sumer u la ong, “da kaba burom, la pyntip hangne ba u Bah Ardent Miller Basaïawmoit u donkti ban tuh, shukor, soi thok bad pyndonkam bakla ïa ka pisa katba u dang long u Chief Executive Member jong ka Khasi Hills Autonomous District Council bad sei ïa ka pisa paidbah ha ka jingthied jaka na ka bynta ka council.”
“Nga long u Executive Member jong ka Council ha kata ka por, bad, namarkata, kine ki jingshisha kiba nga tip. Nga don ïa ki sakhi sabut kiba biang ban pynshisha ïa kane bad kiba la nga tynsat lang kum ka jingpyntip ïa phi,” u la ong.
Une u nongïalam jong ka National People’s Party (NPP) u la kynnoh ba u Bah Basaïawmoit um shym la ïohbor na ki Executive Member jong ka Council ban ïasoi ïa ka ‘sale deed’ bad rejistar ïa ka Sale Deed.
“U (Bah Ardent) shu soi ïa ka soi dulir bym treikam tang ban pyni ïa ka jaka ba la shim bad sei ïa ka pisa T. 35,25,039 na ka Accounts jong ka Council. Ngi ïoh jingtip hadien ba ka dulir ka dei tang ka kot non-judicial kaba T. 10. Ïa ka ‘sale deed’ ym shym la regjistar ne siew ïa ka Stamp Duty. Namarkata, ka dei ka dulir bym treikam ka bym dondor eiei hakhmat jong ka aiñ, bad u la soi ïa ka khlem da ïoh bor tang ban ïoh sei ïa ka pisa paidbah. Haduh mynta, ka Council kam shym la lah satia ban kam trai halor ka jaka ba la thied bad ka la hap ban pynlong ophis ha kawei ka lyngkhot jaka ba la ai sngewbha da ki trai khyndew,” u la ong.
“Ka jingsoi thok ba la leh da u Bah Ardent Miller Basaïawmoit shuh shuh ka paw shai na ki jingshisha haba ka Notice kaba Dated July 15, 2022 la phah da ka Council na ka bynta ka jingsorjamin, u trai jaka Bah Nolipstar Lyngdoh bad u Ardent ki kam ba ki ladep soi ïa ka ‘sale deed’ katba u trai jaka u kam ba um shym la ïoh lut ïa ka pisa bad namarkata, um lah satia ban aiti ïa ka jinglong trai ïa ka khyndew. Kane ka dei ka sakhi na ka jingbuh jingthoh jong ka jingïalang kaba la long ha ka 22 tarik, Naitung, 2022 jong ka,” la bynrap u Bah Sumer.
Shuh shuh, une u EM barim ka KHADC u la ong da ka jingthmu shalyndet ban ïoh sei ïa ka pisa, u Bah Basaïawmoit u la wengkam ïa ki 7 ngut ki nongtrei halor ka nongrim ba ka Council kam don pisa hynrei u la thung bujli 12 ngut da ki briew lajong.
“Namarkata, nga kyrpad ïa phi ban shim khia halor kane ka kam khnang ba un Bah Ardent un ym lait suk halor ka jingpyndonkam bakla ïa ka pisa jong ka Council bad ki paidbah,” la bynrap shuh shuh ka ejahar.
Katba u MDC ka NPP na Rambrai-Jyrngam Bah Bajop Pyngrope ha ka sngi Balang u la byrngem ban mudui ejahar pyrshah ïa u Bah Ardent Miller Basaïawmoit halor ka jyrsieh bamsap na ka jingthied jaka ïa ka Khasi Hills Autonomous District Council (KHADC) ha Mawkyrwat, South West Khasi Hills mynba u dang long u Chief Executive Member (CEM).
