Shillong, K’lyngkot, 22: Ka Khasi Students’ Union (KSU) Delhi Unit ka la ïoh pdiang ïa ka jingïakyrpad jingïarap na kawei ka khynnah kynthei na Meghalaya kaba la pyntip ba ka para jong ka, kaba trei ha Delhi ka la shah thombor bad shah shoh ha ki katto katne ngut ki shynrang ha ka jaka sah jong ka.
Ha u kyrwoh ba la phah sha ki lad pathai khubor ha ka sngi Balang, ka KSU ka la ïathuh hadien ba la ïoh ïa kane ka jingtip ki dkhot KSU Delhi Unit ki la pyntip sha ka SPUNER bad ryngkat bad ki Pulit ka Malviya Nagar ki la poi sha ka jaka bad lah ban pyllait im ïa ka khynnah kynthei na kane ka jaka.
Katkum ka jingïathuh jong u nongshah kynnoh, u la ong ba kane ka khynnah kynthei ka la shim pisa na u bad u la leit sha ka jaka sah jong ka namarba ka la kyntait ban pynphai pat ïa ka pisa, la pyntip ka KSU.
Hynrei kane ka khynnah kynthei ka la ïathuh ha ki pulit ka long ba namar ba ka la kyntait ban rung sha ka kam khaii met bad dei na kane ka daw ba ka la shah thombor ha kitei ki briew, la bynrap u kyrwoh.
“U nongshah kynnoh bad ka nongshah thombor, ki don ha ka jingkhmih jong ki Pulit. Ka KSU ka dang trei ryngkat bad ki bor ba dei peit ban pynthikna ba ïa ka khynnah kynthei yn phah biang sha ïing hadien ba ladep baroh ki jingdonkam jong ka aiñ,” la ïathuh ka KSU.
Ka KSU Delhi Unit ka kyrpad ïa ka Sorkar Meghalaya ba kan shim ïa ki sienjam kiba tyngeh ban khanglad ïa kum kine ki jingjia ha ki por ban dang wan bad kyntu ruh ïa ki paidbah, khamtam ïa kito kiba wad kam ba kin da pynshisha bha ïa baroh ki jingtip bad ki jingïathuh shuwa ban leit trei shabar jong ka jylla.
