Shillong, Jylliew, 19: Da ki spah ngut ki paidbah nongshong shnong ka thaiñ Narpuh ki la shet ja hapdeng ka surokbah National Highway-6 ban pynsdang ia ka jingiakhih da kaba pakhang khlem pud sngi ia kane ka surok naduh ka step sngi Balang.
Ki paidbah na Tongseng, Kuliang, Pyrtakuna, Umkiang, Donaskur, Donaumbluh, Ratacherra, Malidor ki la mih sha surok bad khanglad ïa baroh ki kali kiba pyrshang ban ïaid lyngba ka surok National Highway-6.
Ki Waheh Shnong, kumjuh ruh ki dkhot kiba don ha ka shatri jong ka JAC bad ki paidbah ki la pynpaw ka jingsngewkhia halor ka jingleh mynthi jong ka National Highway Authority of India (NHAI) bad ka Sorkar Jylla halor ka jingsniew jong ka surok bad ong ruh ba kin ïai bteng beit ïa ka jingpakhang surok ba khlem pud sngi tat haduh ba ka Sorkar bad ka NHAI kin da shna bad maramot bha ïa ka surok.
U Chairman jong ka JAC, Bah Lasting Pala u la ong ba ki paidbah ki la ngiah hi shoiñ ïa ki jingkular kai jong ki bor synshar ka East Jaiñtia Hills District bad ka NHAI kiba shu kut tang ha ka ktien katba ka kam pat ka jngai.
Ka jingjot jong ka surokbah National Highway-6 ka la pynsyrtok wat ïa ki paidbah na kiwei ki jylla kiba iaid lyngba kane ka surok.
Katba ki paidbah ki dang ialum hapdeng surok u Block Development Officer (BDO) jong ka Lumshnong C&RD Block Bah L.Kharmon u la hiar sha Ratacherra bad ïakynduh ïa ki nongïalam jong ka JAC bad u kubur ruh ba ka surok ka la sniew shaba palat bad ong ruh ba na ka liang jong ka NHAI ka la sdang ïa ka jingmaramot ha kane hi ka sngi, hynrei watla katta ruh na ka liang ki nongïalam ka JAC bad ki paidbah ki la pyneh bad ong ba kin ym lah ban weng da leilei ruh ïa kane ka pakhang surok tat haduh ban da dep ka jingmaramot ïa ka surok.
Ia kane ka jingïakhih ba la pynlong da ka JAC, la ai jingkyrshan da ka Jaiñtia National Council, ka Hynñiewtrep Youth Council Narpuh Circle, ka Voice of the People Narpuh Circle bad ka East Jaiñtia Hills Truck Owners and Transporters Association.
