Shillong, Naitung 11: Ki nongïalam jong ka Khasi Students Union (KSU) Sengkmie ba la lamkhmat da u President u samla Lambokstarwell Marngar, u General Secretary u samla Donald Thabah ryngkat bad kiwei pat ki nongïalam ki la leit tur sha Sadar Police Station shuwa ban kynjatshai ka bneng tang shu ïoh jingtip ba ki Pulit ki la leit kem shiteng synñia ïa u President jong ka KSU Nongthymmai Circle u samla Eric Nongkynrih.
Ka jingshah kem jong u President ka KSU Nongthymmai Circle ka la jia ruh tang hapoh khyndiat kynta hadien ba u Myntri Rangbah ka jylla u Conrad K. Sangma u la pyntip lyngba ki lad pathai khubor ba ki Pulit ki la pynngat saw tylli ki mukotduma ïa ki kynhun kiba leit ban khynra Work Permit ïa ki nongbylla bar jylla kiba trei ïa ka Project ha madan Polo.
Ki Pulit ki la kem ïa u samla Eric na iing sah jong u na Nongthymmai bad ka daw ka jingshah kem jong une u nongïalam ka KSU Nongthymmai Circle ka dei halor ka jingkhynra Work Permit jong ka KSU ïa ki nongbylla bar jylla kiba trei bylla ha ki thain Nongthymmai.
Ki Pulit ki la rah ïa u samla Eric sha Sadar Police Station bad ki la bat kumba shi kynta eiei hapoh thanat hynrei namar ka jingleit tur ki nongïalam ka KSU sha Sadar, ki Pulit ki la pyllait noh kham hadien.
Halor kane ka jingshah kem jong u samla Eric, ki nongïalam jong ka KSU Nongthymmai Circle ki la shong jingïalang kyrkieh ha ka step sngi Palei ban ïapyrkhat sani halor kane ka kam.
Ha ka jingïakren bad ki lad pathai khubor u Vice President jong ka KSU Nongthymmai Circle u samla Richard Mawkhiew u la pynrem jur ïa ki Pulit namarba ka jingleit kem ïa u nongïalam jong ki ha ka por shiteng miet la kumba leit kem ïa ki lehnoh.
U la ong, lada ki Pulit ki donkam ban pan jingshai eiei na ki nongïalam jong ka KSU ki la dei ban khot mynsngi mynshai ym ban leit kem ïa u briew ha ka por shiteng synñia.
U General Secretary jong ka Circle u samla Riban Nongrum u la kyntu ïa ka Sorkar bad ïa ka tnat Pulit ba kim dei ban pyntyrha ïoh ba ka ding kan klang.
Kum ban shu pynkynmaw ba ha kine ki sngi, ki shnnat treikam jong ka Khasi Students Union ki la pynlong ka jingkhynra Work Permit bad Labour License na ki nongbylla bar jylla ha kylleng ki bynta jong ka nongbah Shillong.
