Shillong, Naiwieng, 20: Ka kynhun ialehkai jong ka Nongnah-Nongkdait Sports Club ka la iohrah ia ka nam lahduh da kaba pynliem noh ia ka kynhun ialehhkai Thiepdiengngan Sports Club ha ka jingiakhun phainal jong ka lympung ialehkai 2nd Wickliff Syiem Memorial Football Tournament 2023 ba la pyniaid da ka KSU Ranikor Circle lem bad ka Nongnah Unit ia kaba la pynlong ha ka shnong Nongnah South West Khasi Hills District ha ka sngi Saitjaiñ jong ka taiew baladep.
Ha kane ka sngi la sakhi lang u Assistant Education Secretary jong ka KSU Sengkmie u samla Shalkitbok Kharbani, u Organising Secretary jong ka KSU South West Khasi Hills District u samla Poljohn, President jong ka KSU Ranikor Circle u Samla Marcony Thongni, ki Myntri Shnong bad paidbah.
Ka Seng ka la pynkup burom ruh ia ki samla pule jong ka shnong Nongnah bad ia uwei u samla pule na ka shnong Keniong kiba la wanrah ia ka nam ka burom ia ka shnong bad ia ka District baroh kawei ha ka jingleit iashim bynta jong ki ha ki lympung ialehkai bad kiwei kiwei ki rynsan iakop.Ka seng ka la pynkup burom ruh ia ka samla samla Greatmercy Langte kaba la jop ia ka rynsan jingiakop Spark Mrs Northeast India 2023 ba la pynlong dang shen ha Guwahati.
