Shillong, Naiwieng, 05: Ka Regional Democratic Alliance (RDA) kaba long ka shatri jong ka United Democratic Party (UDP) bad ka Hill State People’s Democratic Party (HSPDP) kan sa shong jingialang ha ka 7 tarik Naiwieng, ban iathir iatai halor ka elekshon Lok Sabha ka ban sa long ha u snem ban sa wan.
Ka thymmei khubor ka iathuh ba kine ki ar tylli ki seng saiñpyrthei kin sei tang uwei u kyrtong monlang ban pyniakhun na ka Shillong Parliamentary Seat.
Ka UDP ka don mynta 12 ngut ki MLA bad arngut na ka HSPDP ha ka Iingdorbar Thawaiñ kaba 60 ngut ki dkhot. Kine ki ar tylli ki seng saiñpyrthei ki dei kiba iatreilang hapoh ka Sorkar MDA ba la ialam da ka NPP.
Ka State Election Committee jong ka UDP kan sa iakynduh ha ka sngi baar shwa ban shong jingialang ha ka kynhun RDA.
Ka khubor ba la iohlum la iathuh ba u President ka Khasi Author Society (KAS) u Dr DRL Nonglait bad u President barim ka HYC u Bah Robertjune Kharjahrin ki pan tiket na ka UDP ban iakhun ia kane ka elekshon.
