Shillong, Jylliew, 25: Ka Rotary Club of Orchid City Shillong ha ka sngi Balang ka la plie paidbah ïa ka Road Signage ne ka jingkdew ïa ki kyrteng jong ki jaka ban pynsuk ïa ki nongleit nongwan ba la sieh hapdeng surok ka lad Mawlai Bypass.
Ïa kane ka Signage la plie paidbah da u District Governor jong ka Rotary International District 3240 u Sukhminder Singh, ryngkat ka jingdonlang jong u President ka Rotary Club of Orchid City Shillong u Bah Anthony War bad ki nongkitkam shnong ka Mawkynroh-Umshing, ki Pulit ka Mawkynroh Out Post bad kiwei kiwei.
Ka jingpynieng ïa kane ka Signage ka long ban pynsuk ïa ki nongleit nongwan lyngba ka surok Mawlai Bypass khnang ba kin dup tip ïa ki jaka ba ki thmu ban leit katkum ki kyrteng ba kdew namarba ki briew kiba nabar bad ki nongjngohkai pyrthei ki ju pyndonkam na kane ka surok ban rung sha ka nongbah Shillong.
