Shillong, Naitung, 07: Ka Khasi Students Union (KSU) ka lapynpaw ia ka jingsngewkhia halor ka jingshah shoh bad shah pyniap jong ki Khasi ha ki mynder na ka por sha ka por ha jylla Meghalaya khamtam ha sor Shillong, ka sor ba la syrtap da ki mynder nongwei.
Ha u kyrwoh ba la phah sha ki lad pathai khubor ha ka sngi thohdieng da u General Secretary ka KSU, u samla Donald V. Thabah u la ong, “ka KSU ka kwah ban pynkynmaw ia ki parari halor ki jingjia kiba man ka por ha kaba ki mynder ki ju thombor ia ki Khasi khlem kano kano ka daw.”
“Dang ha u 2020, ki mynder Bengali ki la pyniap dusmon ia u Bah Lurshai Hynñiewta ha Pyntha Umdan kaba la pynsmiej ia baroh ki paidbah Khasi kiba sah sha kito ki thaiñ. Ha u 2021 ter ter, ki mynder ki la pyniap dusmon ia u Phershanroy Myrthong ha Golf Links bad ki la bom iap ia u Elias L Nonglait ha Them Bijoy. Ki la bun ruh ki jingshah shoh ki Khasi kum ha Nongmensong, ha Rilbong, ha 4th Furlong bad shawei shawei. Dang shen ar ngut ki samla Khasi kiba dang kamai jakpoh ha Khyndailad ki la shah bom shah tied da ki tiar pynmynsaw ha ki dkhar ba la shongshit khawiang,” ong u kyrwoh.
“Ka KSU ka la ioh jingtip ruh ba mynnin ka miet (Sngi Palei) ka huri hura ha Laitumkhrah ka mih namar ka jingjrong kti khlem daw jong ki dkhar ia ki khynnah Khasi. Kaba sngewphylla ka long haba ki CRPF ki la wan, ki ai jingiada pynban ia kine ki dkhar bad tied lathi naphang ia ki Khasi. Halor kane ka jingjia mynnin, ka seng ka dang iai lum shuh ki jingtip ban ioh ia ka jingshisha kaba la poi haduh uto u pud,” ong u General Secretary ka KSU halor ka jingjia ha ka Laitumkhrah ha ka miet sngi Palei.
“Kine ki jingjia kiba khah khah ki la pynkynmaw ia ka KSU ia ki por kiba la leit kum ha ki phew snem 70, 80 bad 90 ha kaba ki dkhar ki thom naphang ia ki Khasi da ka jingthmu ba pynlong ia ki Khasi ban phetwir noh na Shillong. Ka KSU ka bthah ia ki nongialam Jaidbynriew jong ki dkhar bapher bapher ba ki dei ban tehlakam ia ki briew jong ki, lym kumta ka KSU kam banse ban shim biang da ki sienjam kumba ki nongialam ka seng ki la shim ha kito ki por kum ka Anti-Foreigners’ Movement. Lada ka seng ka hap ban shim ia kita ki sienjam, kine ki jaidbynriew lem bad ka Sorkar kin hap ban bah khlieh lada jia eiei kaba sngewsih,” la maham u General Secretary ka KSU. “Ka KSU ka kyntu ruh ia baroh ki para Khasi ban long kiba la khreh namar kane ka jingleh ki dkhar ka dei ka buit ban pyntreikam ia ki jingthmu ki jong ki, kiba ki la pun naduh ki por mynshwa,” u la bynrap.
