Shillong, Naitung, 07: Ka Khasi Students Union (KSU) East Jaiñtia Hills District Unit, ha ka sngi thohdieng ka la dawa ia ka Jaiñtia Hills Autonomous District Council (JHADC) ba kam dei satia ban ai No objection Certificate (NoC) sha ka North-east Frontier Railway (NFR) ne sha ka Sorkar ban pynpoi ia ka lynti Rel ha Khliehriat, East Jaiñtia Hills District katba ka Sorkar kam pat lah ban wanrah ia ki aiñ kiba khlaiñ kiba iada na ka jingwan tuid kyrthep jong ki briew kiba nabar sha ka jylla Meghalaya.
Ha u kyrwoh ba la phah sha ki lad pathai khubor, ka seng ka la pynpaw ba kan sa aiti da ka jingthoh sha ka Council ha ka taiew ban sa wan namarba ia mynta ka dang don hapdeng ka shuti Behdeinkhlam.
Kane ka jingpyrshah jong ka seng ka long shisngi hadien ba u Myntri Rangbah ka jylla u Conrad K. Sangma u la pynbna ba ka lah don biang ka jingthmu ban wanrah ia ka lynti rel ha ka thain East Jaiñtia Hills District.
“Ka jingthmu jong ka seng ban pynsngew sha ka Jaiñtia Hills Autonomous District Council ka long halor ka nongrim ban kyntu ia ka Council hi baroh kawei ba kan pyrkhat rangbah bad ban ym ai NoC ia ka NFR kaba dei ban khmih ia kane ka projek. Ka seng ka banjur ia ka District Council kaba long ka stieh iada jong ka jaidbynriew ka dei ban pyrkhat sani bha halor kane ban nym ai satia ia ka NoC. Ka seng ka khmihlynti ba ki nongialam bad ki nongmihkhmat jong ka JHADC kin dei ban don kajuh ka sur halor ka lynti Rel,’ ong u kyrwoh na ka seng ba la soi da u President ka KSU-East Jaiñtia Hills u Bah Streamly N. Suchen.
Ka seng ka la aiti ruh da ka jingthoh sha ka Sorkar lyngba u Deputy Commisisoner u Abhilash Baranwal ban pynpaw ia ka jingpyrshah jong ka seng ban pynpoi ia ka lynti Rel ha East Jaiñtia Hills District.
“Ka seng ka iengskhem halor kane ka mat katba ym pat don ki ain kiba khlain ban iada ia ngi kum ka jaidbynriew ritpaid, ka jingiakren halor ka lynti Rel kan sangeh shwa. Ka seng, naduh u snem 1988 ka la pyrshah ia kane ka jingthmu jong ka Sorkar ban iuhroit ia ka jaidbynriew bad kan iai pyrshah katba ka Sorkar kam pat pyrkhat thymmai ban wanrah ia ki ain kiba khlain ban iada ia ngi,” ong u kyrwoh
“Kum ban shu pynkynmaw, ka Sorkar ka la pyrshang ban pyntrei ia kane ka project na Tetelia sha Byrnihat hynrei ka seng ka la pynpulom ia kane ka jingthmu da kaba pyrshah jur bad pynsangeh ia kane ka projek ha u snem 2016,” u la ong.
Ka seng ka kyntu ruh ia ki Dorbar Shnong, ia ki paidbah bad khamtam ia ki MLA bad MP ba kin iatreilang halor kane ka kam bad bynrap ruh ba ka seng kan nang iai buddien ia kane ka kam bad shim ruh ki lad ki lynti ban pynshai sha u paidbah halor ka jingma kiba ap lada wan ka lynti Rel.
“Ka seng ka sngew ban pynpaw ruh sha ka Sorkar ba kam dei ban kyrkieh ia ka lynti Rel hynrei ban wanrah shwa ia ka roi ka par sha ki paidbah ka thain naduh ka surok, ka koit ka khiah, ka pule ka dangle bad kumta ter ter,” la bynrap u kyrwoh na ka seng.
